Old Mortality, Volume 1. Вальтер Скотт

afternoon."

      "Whisht! ye silly tawpie," said her father, "we have naething to do how they come by the bestial they sell – be that atween them and their consciences. – Aweel – Take notice, Jenny, of that dour, stour-looking carle that sits by the cheek o' the ingle, and turns his back on a' men. He looks like ane o' the hill-folk, for I saw him start a wee when he saw the red-coats, and I jalouse he wad hae liked to hae ridden by, but his horse (it's a gude gelding) was ower sair travailed; he behoved to stop whether he wad or no. Serve him cannily, Jenny, and wi' little din, and dinna bring the sodgers on him by speering ony questions at him; but let na him hae a room to himsell, they wad say we were hiding him. – For yoursell, Jenny, ye'll be civil to a' the folk, and take nae heed o' ony nonsense and daffing the young lads may say t'ye. Folk in the hostler line maun put up wi' muckle. Your mither, rest her saul, could pit up wi' as muckle as maist women – but aff hands is fair play; and if ony body be uncivil ye may gie me a cry – Aweel, – when the malt begins to get aboon the meal, they'll begin to speak about government in kirk and state, and then, Jenny, they are like to quarrel – let them be doing – anger's a drouthy passion, and the mair they dispute, the mair ale they'll drink; but ye were best serve them wi' a pint o' the sma' browst, it will heat them less, and they'll never ken the difference."

      "But, father," said Jenny, "if they come to lounder ilk ither, as they did last time, suldna I cry on you?"

      "At no hand, Jenny; the redder gets aye the warst lick in the fray. If the sodgers draw their swords, ye'll cry on the corporal and the guard. If the country folk tak the tangs and poker, ye'll cry on the bailie and town-officers. But in nae event cry on me, for I am wearied wi' doudling the bag o' wind a' day, and I am gaun to eat my dinner quietly in the spence. – And, now I think on't, the Laird of Lickitup (that's him that was the laird) was speering for sma' drink and a saut herring – gie him a pu' be the sleeve, and round into his lug I wad be blithe o' his company to dine wi' me; he was a gude customer anes in a day, and wants naething but means to be a gude ane again – he likes drink as weel as e'er he did. And if ye ken ony puir body o' our acquaintance that's blate for want o' siller, and has far to gang hame, ye needna stick to gie them a waught o' drink and a bannock – we'll ne'er miss't, and it looks creditable in a house like ours. And now, hinny, gang awa', and serve the folk, but first bring me my dinner, and twa chappins o' yill and the mutchkin stoup o' brandy."