предаемы. Мы же о сем многажды покушахомся месть сотворити врагом своим, и ничтоже успехом: ни разумехом сего, еже господь наказует нас сими, а не поганых поспешство над нами, и сими великими казньми в покаяние не внидохом, сами межъусобство зло сотворихом и бедным хрестъяном всякое насильство чынихом. И милосердый господь за премногия грехи наша наказуя нас ово потопом, ово мором и различными болезнеными бедами, и никакоже не наказахомся. И посла Господь на ны тяжкия и великия пожары. Вся наша злая собрания потреби и прародительское благословение огнь пояде, паче же всего святыя божия Церкви и многия великия и неизреченныя святыни, и святыя мощи, и многое безчисленное народа людска. И от сего убо вниде страх в душю мою и трепет в кости моя, и смирися дух мой и умилихся, и познах своя согрешения, и прибегох ко святей соборной и апостольстей церкви, и припадох к божию великому человеколюбию и к пречистой Богородицы, и ко всем святым, и ко твоему первосвятительству, и всем иже с тобою святителем, и умильно припадая со истинным покаянием прося прощения еже зле содеях и божия ради великия милости получих от вас мир и благословение и прощение о всем, еже содеях зле, тогда же убо яз ко всем своим князем и боляром по вашему благословению, а по их обещанию, на благотворение подах прощение в их к себе прегрешениях. И по вашему благому совету, богу помогающу, нам начах вкупе устрояти и управляти богом врученное ми царство, елико бог поспещит. А у него милости и помощи прося, еще же молю вашу святыню и преподобие и о сем прострите прилежную молитву ко всесильному и милостивому богу, еже за многия грехи наша попустил на нас бог многую скудость всякому плоду земному, такоже и скотам и птицам и прочему изобилию и всякому стяжанию, и аще вашими отеческими молитвами умолен будет о нас бог, и милостива его себе сотворим, и очистимся от всяких грех душевных и телесных, и тако уповаем на милость его, да помилует нас и не презрит моления нашего, щедр бо есть и милостив и не оставит нас сирых, но послет благодать свою в помощь рабом своим, и просветит ум наш, и утвердит страх свой в нас, и укрепит ноги наша на путь мирен, и наставит на всякое дело благо, и гобину подаст всяческих плодов, и вся враги наша видимыя и невидимыя вскоре да покорит под нозе наши. Вы же господие отцы наши, пастыри и учители, внидете в чювствы ваша, прося у бога помощи, истрезвите ум ваш, и просветитеся во всяких богодухновенных обычаех, якоже предаде вам господь ваше же от бога порученное вам стадо словесных овец всего православного християнства росийского царствия, наполнив себе духовныя пользы святаго писания, мене сына своего наказуйте и просвещайте на всяко благочестие, якоже лепо есть благочестивым царем быти во всяких царских праведных законех и во всяком благоверии и чистоте, братию же нашу и всех князей, и боляр, и все православное хрестьянство неленостно и тщательно утвержайте и вразумляйте
