Januarie
Luister aandagtig na God
Lees Eksodus 15:22-27
Hy het gesê: “Julle moet goed luister na wat Ek, die Here julle God, sê! Julle moet doen wat reg is in my oë, gehoor gee aan my gebooie en alles doen wat Ek vir julle voorskryf – Eks 15:26
Toe die Israeliete by die Surwoestyn kom, kon hulle vir ’n paar dae geen water kry nie. Toe hulle uiteindelik by Mara aanland, kon hulle die water nie drink nie, want dit was bitter. Oudergewoonte kla hulle by Moses en wil by hom weet wat hulle moet drink. Op die Here se bevel gooi Moses ’n stuk hout in die water sodat dit soet en drinkbaar word.
Met hierdie waterskaarste wou die Here die volk op die proef stel, staan daar in Eksodus 15:25. God het ook baie ernstig met hulle gepraat en hulle gevra om goed na Hom te luister en Hom te gehoorsaam. Dan onderneem Hy om die siektes waarmee Hy Egipte getref het van hulle te weerhou.
Die Hebreeuse teks beteken hier letterlik om met absolute aandag na God se stem te luister. Wanneer God se kinders na sy stem luister, onderneem Hy om hulle te help en te seën. In Deuteronomium 28:1-2 is ’n pragtige belofte vir die nuwe jaar opgeteken: “As jy goed luister na die Here jou God […] sal al hierdie seëninge oor jou kom en jou lewe verryk.” Probeer vanjaar doelbewus om met absolute aandag na God se stem te luister, om te doen wat reg is in sy oë en sy gebooie te gehoorsaam. As jy dít kan regkry, sal sy seëninge jou lewe verryk.
Here, ek wil graag vanjaar met absolute aandag na u stem luister, doen wat reg is en u gebooie nakom sodat ek u hulp en seën in die jaar wat voorlê kan ervaar.
Amen
19 Januarie
Gee aandag aan wat jy hoor
Lees Markus 4:21-25
Hy het ook vir hulle gesê: “Gee aandag aan wat julle hoor! Want met die maat waarmee julle meet, sal vir julle gemeet word en daar sal vir julle nog toegevoeg word. Wie het, vir hom sal daar nog meer gegee word; en wie nie het nie, van hom sal ook die bietjie wat hy het, weggevat word” – Mark 4:24-25
Jesus waarsku hier dat God se koninkryk aan die kom is. Volgens Die Bybellennium (p 1201) begin dit op ’n half weggesteekte manier, maar uiteindelik sal ons almal dit sien. Dié mense wat ore het om te luister, moet dus góéd luister. As ons bereid is om na God se stem te luister, sal Hy ons help om geestelik sterker te word. In vers 24, sê Jesus:“Whoever has, will be given more” (NIV).
Jy gaan God se stem nooit duidelik genoeg met jou hoor praat as jy nie ’n spesiale poging gaan aanwend om na Hom te luister nie.
Dit hang dus van jouself af hoeveel seën jy vanjaar van God gaan ontvang. Maak doodseker dat jy op die regte manier na sy stem sal luister. “Pas dus op hoe julle luister, want wie het, vir hom sal nog meer gegee word,” lui die Lukas-weergawe van ons teksvers (Luk 8:18). Die manier waarop jy jouself vir God oopstel, gaan die mate bepaal waarin Hy Homself in die nuwe jaar aan jou gaan openbaar.
Here, ek wil myself nou oopstel vir u stem en só fyn na U luister dat U Uself aan my sal openbaar en dat daar nog méér vir my gegee sal word. Maak dit vir my moontlik, asseblief.
Amen
20 Januarie
Met Jesus as voorbeeld
Lees 1 Petrus 2:18-25
Juis hiervoor is julle ook geroep, omdat Christus self vir julle gely en so vir julle ’n voorbeeld gestel het, sodat julle in sy voetspore kan volg – 1 Pet 2:21
Petrus praat hier met Christene oor hoe hulle teenoor hul onredelike werkgewers moet optree. Omdat die werknemers vir wie hy skryf uitlanders is, kan hulle nie sommer uit hul werk bedank nie, want dit sou moontlik beteken dat hulle nie langer ’n blyplek óf werk sou hê nie. Petrus vra dat werknemers wat onregverdig behandel word, in Jesus se voetspore moet volg. Hy het sy lyding op aarde só hanteer dat Hy vir elkeen van sy volgelinge wat ná Hom kom ’n navolgenswaardige voorbeeld gestel het van hoe dit gedoen behoort te word.
Die riglyne wat Petrus hier gee, is steeds op hedendaagse Christene van toepassing. Ongelukkig word Christene baie maal ook nie regverdig in die werkplek behandel nie, juis ómdat hulle anders glo en optree as hul werkgewers. Ons moet net soos Jesus maak en in sy voetspore volg, skryf Petrus: Jesus het nie leuens vertel om uit die moeilikheid te bly nie (1 Pet 2:22). Hy het die mense wat Hom beledig het nie terug beledig nie, Hy het nie die mense wat Hom laat swaar kry, gedreig nie, maar Hy was gewillig om alles in die hande van sy Vader te laat (1 Pet 2:23). As jy moontlik vanjaar in jou werkplek te doene kry met ’n onredelike werkgewer wat onmoontlike eise aan jou stel, kan jy hierdie riglyne met groot sukses navolg.
Here Jesus, U weet dat dit nie altyd in my werkplek regverdig gaan nie. Dankie vir die voorbeeld wat U vir my stel. Maak dit vir my moontlik om vanjaar in u voetspore te volg.
Amen
21 Januarie
Met Jesus in jou lewensboot
Lees Matteus 8:23-27
Toe Jesus in die skuit klim, het sy dissipels Hom gevolg.
Skielik het daar ’n hewige storm op die see losgebars, sodat die golwe oor die skuit geslaan het. Maar Jesus het geslaap – Matt 8:23-24
Jesus se teenwoordigheid in die klein bootjie op die groot meer maak ’n wêreldse verskil. Tog, toe die storm losbars, slaap Jesus. Dit lyk byna nie asof Hy omgee wat met die dissipels gaan gebeur nie. Hulle weer, beoordeel hul kanse op oorlewing in menslike terme. Daar het geweldige storms op die See van Galilea opgekom, en so ’n storm kon werklik lewensgevaarlik wees. Die dissipels is dus met reg bang in die klein bootjie op die onstuimige see.
Maar toe hulle Jesus wakker maak, verander hul situasie soos handomkeer. “Here, red ons! Ons vergaan!” roep hulle. “Waarom is julle bang, kleingelowiges?” wil Jesus weet. Dan praat Hy met die wind en die see – en die storm bedaar onmiddellik.
Mense wat vanjaar vir Jesus in hul lewensboot het, hoef geen storms te vrees nie. Sy teenwoordigheid in jou lewe maak die verskil tussen lewe en dood; krisis en vrede. Wanneer Hy in jou lewe teenwoordig is, kan daar niks gebeur wat jou gaan onderkry nie, wat jy nie saam met Hom sal kan hanteer nie. Indien daar wel krisisse in jou lewe opduik en dit vir jou lyk asof Jesus onbetrokke is, moet jy maar net bly glo en bid – Hy sal altyd sorg dat die storms in jou lewe bedaar. Sorg net dat jy nie ’n enkele dag van die nuwe jaar sonder Hom ingaan nie.
Here Jesus, dankie vir die versekering dat U in my lewensboot teenwoordig is, en ek dus vir geen storm hoef bang te wees nie. Help my op dié dae wanneer my geloof min word.
Amen
22 Januarie
Neem die regte besluite
Lees Jakobus 1:2-8
As een van julle wysheid kortkom, moet hy dit van God bid, en Hy sal dit aan hom gee, want God gee aan almal sonder voorbehoud en sonder verwyt – Jak 1:5
“Die verloop van ons lewens hang uiteindelik af van die besluite wat ons neem, en nie van ons gevoelens nie,” sê Derek Prince. Daar is altyd twee kante van jou verhouding met God: dit wat God aan jou beskikbaar stel, en hoe jy daarop gaan reageer. Miskien kan jy nie vanjaar jou omstandighede kies nie, maar jy kan wel kies hoe jy op daardie omstandighede gaan reageer. Aan die begin van ’n