dat ons perspektief verloor. Dit steel ons selfvertroue en maak ons passief. Dit veroorsaak dat ons vergeet hoe almagtig God is en dat niks vir Hom onmoontlik is nie.
In ’n stadium in Dawid se lewe moes hy dag in en dag uit voor Saul en sy manskappe vlug. In hierdie situasie kon hy toegelaat het dat vrees hom onderkry, maar hy het gekies om sy vertroue in God te plaas. Kyk weer na sy woorde in Psalm 118:5–6: “In my nood het ek na die Here geroep, die Here het my gebed verhoor en my bevry. Die Here is by my, ek ken geen vrees nie; wat kan ’n mens aan my doen?” Ook in Psalm 91:7 lees ons: “Al val daar duisende langs jou, tienduisende by jou, vir jou sal niks tref nie.”
Wat staar jy vandag in die gesig? ’n Finansiële krisis? Dreigemente van ’n egskeiding? ’n Krisis met jou kind? Aflegging by die werk? Onthou, God is almagtig. Hy kan en wil jou deur die situasie dra.
Van tyd tot tyd stap ons almal deur daardie lang donker gang op pad na ’n onbekende geluid in die donker kombuis. Gaan jy die ergste verwag of gaan jy jou daaraan herinner dat jy nie alleen in die gang stap nie? God is reg langs jou – en Hy weet reeds wat in die kombuis wag. Menige keer is dit ook maar net Gemmer die huiskat!
Gebed
Vader God, baie dankie dat U konstant by my is deur u Heilige Gees. Lei my asseblief om nie vas te kyk in die “wat as” nie, maar om my oë op U te vestig met die wete dat U my nooit sal verlaat of in die steek sal laat nie. Ek bid dit in die Naam van Jesus Christus. Amen.
Besprekingsvrae
1 Wat is primêre vrese waarmee jy in jou lewe sukkel? Skryf dit neer.
2 Hoekom is dit belangrik om hierdie vrese te identifiseer?
3 Lees Psalm 118:5–6. Watter berusting bring hierdie teksverse jou? Vertrou jy meer op God as op mense (veiligheidspersoneel, jou familie en die polisie) vir jou veiligheid?
4 Lees Psalm 91:7–10. Wat is die voorwaarde om God se beskerming te beleef?
5 Hoe kan ons vreesaanjaende situasies anders hanteer wanneer ons weet dat God ons beskerm?
2
Hoekom moet ons van vrees wegbly?
1 Petrus 5:7–9
Werp al julle bekommernisse op Hom, want Hy sorg vir julle. Wees nugter, wees wakker! Julle vyand, die duiwel, loop rond soos ’n brullende leeu, op soek na iemand om te verslind. Bly standvastig in die geloof en staan hom teë.
Job 3:25
Wat ek gevrees het, het oor my gekom; waarvoor ek bang was, het my getref.
2 Timoteus 1:7
Die Gees wat God ons gegee het, maak ons immers nie lafhartig nie, maar vul ons met krag en liefde en selfbeheersing.
Jesaja 54:17
Geen wapen wat gesmee word om jou aan te val, sal iets uitrig nie; elkeen wat vals teen jou getuig, sal gestraf word. Dit is hoe Ek, die Here, vir my dienaars sorg. Ek laat geregtigheid aan hulle geskied, sê die Here.
Het jy al ’n boksgeveg of ’n tenniswedstryd dopgehou? Vir iemand met geen kennis van sport nie lyk dit asof die twee boksers bloot vir ’n vale rondtrippel en nou en dan ’n hou inkry en die twee tennisspelers asof hulle net die bal oor die net probeer moker. Tog is al twee sportsoorte uiters strategies. Opponente is konstant besig om mekaar te ontleed en swak punte te identifiseer sodat hulle mekaar kan uitoorlê.
Satan is ons vyand. In 1 Petrus 5:8 lees ons dat hy daagliks soos ’n brullende leeu rondloop en soek na maniere om ons aan te val. Job is ’n sprekende voorbeeld hiervan. Hy het ’n mooi huis gehad, ’n klomp besittings, ’n string kinders en boonop ’n wonderlike verhouding met God. Satan het niks daarvan gehou nie. Wat hom veral frustreer het, was dat sy aanvalle op Job nie gewerk het nie, omdat God ’n muur van beskerming rondom hom, sy familie en ook sy besittings geplaas het (Job 1:10, 1953-hersiening).
Job het egter een groot swak punt gehad: vrees dat sy familie of besittings iets sou oorkom. Satan het dit gesien en toe hy ’n geleentheid kry om Job se geloof te toets, het hy hom geslaan waar dit hom die seerste sou maak. In Job 3:25 lees ons Job se woorde nadat hy alles verloor het: “Wat ek gevrees het, het oor my gekom; waarvoor ek bang was, het my getref.”
Watter vrese koester jy in jou lewe? Is jy uitermate bang dat jou kinders iets sal oorkom of dat jou huweliksmaat ontrou aan jou sal wees? Of dalk dat jy en jou gesin in ’n motorongeluk betrokke gaan wees of dat jou besigheid bankrot verklaar gaan word? Besef jy dat die vyand sy ore spits?
In 2 Timoteus 1:7 lees ons: “God het ons nie ’n gees van vreesagtigheid gegee nie, maar van krag en liefde en selfbeheersing.” In Jesaja 54:17 lees ons: “Geen wapen wat gesmee word om jou aan te val, sal iets uitrig nie […] Dit is hoe Ek, die Here, vir my dienaars sorg […]?
Wanneer ons toelaat dat vrees in ons lewens groter word as ons geloof in God, word ons ’n maklike teiken vir die vyand. Behou dus jou fokus. Trek jou bokshandskoene aan terwyl jy jou (en ook die vyand) daaraan herinner dat God die laaste sê in elke situasie het. En wanneer Hy ’n muur van beskerming rondom jou geliefdes en besittings plaas, kan geen brandpyle van die vyand jou raak nie.
Gebed
Vader God, baie dankie dat ek elke vrees in my hart na U kan bring. Lei my asseblief daagliks deur u Heilige Gees om met groter geloof vreesloos te leef. Ek bid dit in die Naam van Jesus Christus. Amen.
Besprekingsvrae
1 Lees Job 3:25. Hoe het die vyand geweet wat Job die seerste sou maak?
2 Lees 1 Petrus 5:7. Wat kan ons van dag tot dag met ons vrese doen?
3 Lees 1 Petrus 5:8–9. Wat is die gevaar wanneer ons vrese in ons lewe koester en heeltyd daaroor praat? Hoe staan ons die vyand teë as dit kom by vrese in ons lewens?
4 Lees weer 2 Timoteus 1:7. Wat beteken die teksvers vir jou?
5 Lees weer Jesaja 54:17. Watter berusting bring hierdie belofte van God jou?
3
Die balansskaal: Vrees versus geloof
Hebreërs 11:1 (DB)
Wat beteken dit om op God te vertrou? Geloof of vertroue in God beteken om nie een oomblik te twyfel nie dat Hy sy beloftes sal hou en om daarna uit te sien. Ons kan dit wel nie nou al sien nie, maar ons weet vir seker dat dit sal gebeur.
Matteus 17:20
As julle maar geloof het so groot soos ’n mosterdsaadjie, sal julle vir hierdie berg sê: Gaan staan daar anderkant! en hy sal gaan. Niks sal vir julle onmoontlik wees nie.
Lukas 1:37
Niks is vir God onmoontlik nie.
Dink vir ’n oomblik aan ’n balansskaal. Sodra ’n swaar voorwerp op die een kant van die skaal geplaas word, beweeg daardie kant dadelik ondertoe terwyl die ligte kant van die skaal na bo beweeg. Sodra jy egter ’n voorwerp met dieselfde gewig as die eerste een aan die ligte kant plaas, sal dit die skaal laat balanseer.
Ons lewens kan met hierdie balansskaal vergelyk word, met vrees en geloof as die “voorwerpe” wat die skaal op en af laat beweeg. Wanneer ons byvoorbeeld deur ’n moeilik situasie gaan en toelaat dat vrees ’n houvas op ons kry, verdwyn ons geloof in God, en weeg die “vreeskant” van die skaal die swaarste. Wanneer ons egter in die uitdagende situasie kies om aan God se beloftes vas te hou en sterk in die geloof te staan, word die “geloofkant” van ons skaal swaarder en verbreek ons die houvas wat vrees op ons lewens het.
Nie een van ons is gevrywaar van uitdagende, vreesagtige situasies nie. Ons elkeen het egter wel ’n keuse oor hoe ons in hierdie moeilike tye gaan reageer. Gaan ons toelaat dat vrees ons geloof uitdoof of gaan ons vrees met ons geloof verdryf deurdat ons kies om ons oë op God te hou en Hom te vertrou om die onmoontlike moontlik te maak?
Geloof