•Moses se eerste toespraak (1:1-4:43).
•Moses se tweede toespraak (4:44-26:19).
•Moses se derde toespraak (27:1-30:20).
•Moses se laaste toespraak en dood (31:1-34:12).
Let op na:
•Die belangrikheid van die verbond met God.
•Hoe baie gedeeltes hiervan deur Christus aangehaal word.
Christus in Deuteronomium:
•Christus is die vervulling van die verwagting van die Messias as Profeet (18:15), Priester (vgl. Eks 28:1; Heb 2:17) en Koning (17:15).
•Jesus sê Moses het van Hom geskryf (vgl. Joh 5:46).
MAANDAG 2 JANUARIE 2017 Lees eers Deuteronomium 1:1-8
OP PAD MET GOD
Ek stel hierdie land tot julle beskikking. Trek in en neem dit in besit (1:8).
GESELSVRAAG: Waarheen is ons vanjaar met God op pad?
“Vir die eerste keer sien ek daarna uit om terug te gaan werk toe,” vertel ’n ingenieur wat lank in die staatsdiens was en tans as raadgewende ingenieur praktiseer. Hy het ’n toekoms gesien wat nie maklik deur korrupte staatsamptenare verongeluk kon word nie. Nou kan hy self beplan en ’n sukses van sy werk maak.
Moses het die volk bymekaargeroep om die deel van die wet te herhaal wat gewone gelowiges raak. Aangesien hulle dit nie op skrif gehad het nie, moes hulle elke jaar kom luister na die voorlees van hierdie boek (vgl. 31:1-13). Ons moet dus verwag dat die Here vanjaar ook met ons deur hierdie boek wil praat. Die toekoms is in die Here se hande, Hy is in beheer. Ons is dus veilig solank ons mooi luister en gehoorsaam is.
Ons is ook op pad na die beloofde land. Ons weet tog dat dit nie in hierdie wêreld is nie. Dit wag in die ewigheid. Tog is ons ook elke dag met die Here op pad. Alles wat ons vandag dink, sê en doen, sal eendag na ons toe terugkom (vgl. Op 20:12). Die Here laat ons nie alleen nie. Hy belowe om elke dag by ons te wees (vgl. Matt 28:20). Daarom is dit belangrik om elke dag van hierdie nuwe jaar tyd te maak om na Hom te luister.
GEBED: Here, dankie dat U vir ons ’n ewige blyplek voorberei. Lei ons vanjaar elke dag op die regte pad.
Lees vanaand in Deuteronomium 1:9-18 watter soort leiers ons nodig het en hoe hulle moet optree.
DINSDAG 3 JANUARIE 2017 Lees eers Deuteronomium 1:19-31
GEDRA OP DIE WOESTYNPAD
Julle het in die woestyn ondervind hoe die Here julle God julle die hele pad waarlangs julle tot hier toe gekom het, gedra het soos ’n man sy seun dra (1:31).
GESELSVRAAG: Wat was die swaarste tyd in jou lewe tot dusver?
“Here, waar was U toe dit so moeilik met my gegaan het? Ek sien dan net een ry spore in plaas van twee,” kla iemand wat gedroom het hy loop saam met die Here en toe hy omkyk, sien hy plek-plek net een ry spore. “Dit was die tye toe Ek jou gedra het,” kom die Here se antwoord.
Moses herinner die volk aan wat alles oor hul pad gekom het. Op een tydstip was hulle op die rand van die beloofde land, maar hulle moes terugdraai omdat hulle ongehoorsaam was. Het hulle dan vergeet van die tye wat dit goed gegaan het, toe hulle nog gehoorsaam was?
Ons het seker al almal so ’n woestynervaring gehad. Dit was moeilike tye en ons het amper moed opgegee. Tog het die Here ons daardeur gelei, en ons het veilig anderkant uitgekom. Dit is sulke ervarings wat ’n mens se geloof sterk maak. Dink net wie almal in die Bybel so ’n woestynpad moes loop voordat hulle gereed was vir hul eintlike werk. Ons hoef dus nie bang te wees vir enige uitdagings wat vanjaar op ons wag nie, solank ons op die Here alleen vertrou. Hy sal ons lei.
GEBED: Baie dankie dat ek saam met U hierdie nuwe jaar kan begin, Vader. Dra my waar ek swak is en bring my veilig by u huis.
Lees vanaand in Deuteronomium 1:32-46 hoe gevaarlik dit is om nie elke dag na die Here se opdrag te luister nie.
WOENSDAG 4 JANUARIE 2017 Lees eers Deuteronomium 2:1-12
DIE REGTE LEIER
Die Here julle God het julle voorspoedig gemaak in alles wat julle gedoen het (2:7).
GESELSVRAAG: Wie is ons beste leier in hierdie tyd?
“Sedert ek my maatskappy aan die Here oorgegee en tot sy beskikking gestel het, het Hy ons wonderlik geseën,” vertel RG LeTourneau, die vervaardiger van reuse-grondverskuiwingsmasjiene. Hy het dramaties gevorder van ’n bankrot sweiser tot iemand wat 90% van sy persoonlike inkomste aan die Here se werk gegee het. Vandag is ’n universiteit in Texas na hom genoem.
Moses herinner die volk daaraan hoe die Here hulle in hul woestyndae stap vir stap gelei het, en ook waar om nie grond te soek nie. Die volke wat ver langs familie van hulle was, is met die grootste respek behandel. Hulle het God se leiding gevolg, en dit het goed met hulle gegaan.
Deesdae dink mense dat hulle as Christene nie sukses kan behaal nie. Ons moet ons by vandag se korrupte wêreld aanpas. Maar is dit reg? Het die Here verander? Hy stel vandag nog net so baie in sy kinders belang, veral waar hulle die meeste van hul tyd deurbring. Hy belowe om ons te beloon as ons in ons werk aan Hom getrou bly (vgl. Kol 3:23-24). Ons land het sakelui met integriteit nodig. Miskien is jy die een wat Hy vanjaar wil gebruik. Maak dus elke dag tyd om Hom te vra hoe om elke uitdaging die hoof te bied.
GEBED: Here, sonder U kan ek niks doen nie. Lei my vanjaar sodat ek U in alles kan verheerlik.
Lees vanaand in Deuteronomium 2:13-23 hoe die Here ook vir ander volke sorg en beskerm.
DONDERDAG 5 JANUARIE 2017 Lees eers Deuteronomium 2:24-37
GOD BLY IN BEHEER
Die Here het hom koppig gemaak om hom in jou mag oor te gee. Hy is nou nog in jou mag (2:30).
GESELSVRAAG: Wie maak die wêreld vir jou moeilik?
“Ons het baie teenstand van een van die plaaslike leiers gekry,” vertel ’n sendeling. “Toe het die Here my gewys hoe ek hom moet benader. Hy het nie alleen vir ons toestemming gegee om voort te gaan nie, maar hy was uiteindelik die een wat die werk die meeste bevorder het.” Vir die Here is alles moontlik.
Moses herinner die volk daaraan hoe die Here vir hulle voorsien het deur die aggressiewe koning Sihon in hul hande oor te gee. So het Israel grond oorkant die Jordaanrivier bekom wat hulle eeue lank bewoon en benut het. Maar Israel het besef dat alles wat gebeur het, nie toevallig was nie. Die Here was in beheer. Dit was sy manier om vir hulle te voorsien.
Ons weet nie watter uitdagings hierdie jaar op ons wag nie. As ons die Here nie geken het nie, sou ons maklik moedeloos kon word. Maar ons Vader is steeds in beheer. Ons kan Hom vertrou. Ons moet net seker maak dat ons sy leiding reg verstaan en gehoorsaam. Hy bou ons geloof deur die uitdagings en probleme wat ons ervaar. So kan ons Hom ál beter leer ken. Dit is juis in tye van teenstand dat ons leer Wie eintlik in beheer is. Wees bloot gewillig om by die Here te leer.
GEBED: Hemelvader, ons weet nie wat vanjaar vir ons voorlê nie, maar U weet. Lei ons deur elke krisis.
Lees vanaand in Deuteronomium 3:1-11 hoe die Here soms sukses aan sy mense gee.
VRYDAG 6 JANUARIE 2017 Lees eers Deuteronomium 3:12-20
HELP MEKAAR
Julle moet saam met julle volksgenote trek totdat die Here ook aan hulle, soos aan julle, ’n veilige woonplek gegee het … (3:20).
GESELSVRAAG: Watter mense wat ons ken, het hulp nodig?
“Elkeen vir homself” is iets wat in vandag se wêreld ál meer geld. Hierdie selfsugtige gesindheid is presies die teenoorgestelde van wat die Here van sy kinders verwag. Ons is daar om mekaar te help. So kan ons vir mekaar tot seën