Qabusnomə. Unsur əl -Məali ibn Keykavus ibn İsqəndər

pi ki bıeş, həni ıştə cıvonəti hoqqəbozətion bınə bə bın, səbin bəy ki, ıştı oxo nez bıencə, cıvonətiku duəro bıedəş.

      İnsonon umr bənə həşiye – cıvonon qılə şərğədəy, pion qılə qərbədə. Ə həşi ki qərbədəy, hisobkə ki, əv həni eşə.

      Mı çe ımi barədə votəme:

      Ociz mandə pipışkəti vədə dınyo,

      Şesti rəsəş- və'də nez bıə, bəpe bımyo.

      Çoştə nomoj dəvarde, çe əsri vaxte,

      Xiftə nomoj- umri oxoy, marde vaxte.

      Məhz bı səbəb pi bə cıvonəti eşğ bəpe dənışu.

      Həmişə bə pion mərhəmət nışon bıdə. Səbin bəy ki, piəti jıqo qıləy noxəşiye ki, bə noxəşon qınieyro hiç kəs omedəni. Jıqo qıləy darde ki, sıvoy marde çorəş ni.

      Bə səbəbən pi nımardo, ıştə coni roxniey nibəzıne.

      Har nəxoşiədə xəş bıey umi heste, sıvoy piəti.

      Çe pi xəş bıey umi rujbəruj kam bəbıe.

      Qıləy kitobədə handəme:

      ˝Odəmi tosə 34 sinni həm ğədd-ğamət, həmən dasti zuş şey-şey vey bıey bəzıne. 34-ku tosə 40-i çoko heste, heqo jəqoən bəmande – nə ziyod bəbıe, nə bə kam (Həşiyən nimrujə bəpeştə bə ğurubi səmt de tovi eşedəni). 40-ku tosə 50 sorbəsor ıştəku zəifəti hiss bəkarde, 50-ku tosə 60-i manqbəmanq, 60-ku tosə 70 haftəbəhaftə, 70-ku tosə 80 rujbəruj. Şayət 80-ku bəpe yaş bıko, bəvədə sahatbəsahat əzob-əziyətış ziyod bəbıe.˝

      Çoknə ki, çe sırdi (şındı-red.) pillə çıle, oxonnə pilləku sape həni peşey bıedəni, məcburiş ki, bəji etatiy – çe umri pillonən çəy timsalədən.

      Har sahat çe odəmi əzob-əziyətış ziyod bıedəbu, əv çoknə şoy-voy bəzıne kardey?

      Çımı balə, məvuji çe piətikum bətı vey şikat karde. Çiç bıkəm oxo?! İnson ki pi bıe, qırəy vey bəkarde, təəccub məkə. Piəti dışmene. Dışmeniku şikat bəkarden.

      Mı votəme:

      Piku bəşikatim, mənvışt bə qıno,

      Əv çemı dışmene,çemı çı qıno?

      Çımı balə, çımı ən nezə dust tıniş. Dışmeniku bə dusti şikat bəkarden.

      De Xıdo rizo, tınən ın şikati bə ıştə nəvə-nəticon bəkardeş.

      Çe ımi barədə az votəme:

      Pi bim,eməm bə ki bıkəm şikat az,

      Cıvonon çı dardiku nişone xəbə.

      Dardi dəmon tıniş bomı, sıvoy əy

      Niye bızın, əcəl omə,umr səbə.

      Əve, pion çiç kəşey, sıvoy pion hiç kəs dəərəs ni.

Hikoyət

      Çımı pıə dəftəri qıləy yolış hestbe (çe administrasiyə rəhbər-red.). Nomış Komilbe. Sinnışən həştosə bəpe əbiy. Piyedəşbe asp bıstənı. Mehtəri qıləy aspış varde, ğəşənqə ranqış hestbe, kok, dast-lınqonış sərost. Komili bəqəmış karde, ğıyməti rozi bıen, peşo əv bə çə aspi qəvədə bıə dandonon erəxe, ıştə fikriku qarde. Vote ki, ın asp piye.

      Qıləy cıvonə zoə həmonə aspış hırie.

      Az parsem Komiliku ki, əy çıro ə aspış nıstəne?

      Komili vote:

      – Ə cıvonə zoə çe piətikuş xəbə ni. Çe aspi zahir bəy xoş oməbu, ımi bəyro dəvardey bəbıe. Əncəx oxo çımı çe piəti əzob-əziyətikum xəbə heste. Ehanə az piə asp bıstənom, bomı ayb bəbıe.

* * *

      Çımı balə, cəhd bıkə ki, piətiədə səyohət məkə, i vırədə bıji. Çun boçi, bə səfər beşey bo pion çokə ko ni. Məxsusən, bo beçizə pion. Səbin bəy ki, həm piəti dışmene, həmən beçizəti. De dıqlə dışmeni bə səfər beşey bə ağılmandə odəmi daməni. Əmmo şayət beçorə bımandoş, bə səfər beşoş, Xıdo ıştı ko sərost bıko ın səfərədə, har çi səğ-səlomət orəxo, ım həlbəttə, kədə nışteysə çoke. Əncəx jıqo holədə, məvot ki, az hıkmən bəştə vətən bəpe oqardım. Konco botıro çok dəvardedə – əvrəən ıştı vətəne. Əvən duze ki, votedən: ˝Vətən dıminə moəy˝.