help met die verwagting om ten minste ’n woord van dank te ontvang, word jy dikwels teleurgestel. Daarom moet ons liewer mense help omdat Jesus dit van ons verwag en nie om die eer van mense daardeur te verwerf nie.
In vandag se gedeelte leer ons hoe iemand wat van sy velsiekte genees is, weer vir die Here kan dankie sê. Hy moes na die tabernakel toe gaan om die Here te dank, en sekere dankoffers saamneem wat hy met die priester moes deel. Dit was ’n hele plegtigheid, sodat die volk daarna geweet het dat hierdie mens nie meer onrein is nie, en dat hulle vryelik met die persoon kon omgaan sonder die gevaar om aan te steek.
Ons almal het so baie dinge om vir die Here voor dankie te sê. Ons hoef nie te wag tot ons wonderbaarlik van ’n siekte genees is nie. Ons kan dankie sê vir ons gesondheid, ons werk, ons gesin, ons huis, dat ons kan sien en hoor, en duisende ander dinge. Maar ons wil dit nie net sê nie. Ons wil dit ook wys deur die dankoffers wat ons aan die Here gee. Hoe dankbaar is jy as jy kyk hoeveel van jou inkomste jy in die Here se werk belê?
GEBED: Dankie vir al u seëninge, Hemelvader.
Lees vanaand in Levitikus 14:21-32 hoe ’n arm persoon ook vir die Here kan dankie sê vir sy genesing.
Woensdag 21 Januarie 2015 • Lees eers Levitikus 14:33-47
Maak jou huis veilig
Julle gaan intrek in die land Kanaän wat Ek vir julle as besitting gee (14:34).
GESELSVRAAG:
Watter gevare kan julle huis bedreig?
“Baie van die geskiedkundige ou huise op die dorp is sonder behoorlike fondamente en van rou stene gebou. As daar dus water inkom, kan dit die mure onveilig maak. Die munisipaliteit kan jou verplig om jou huis plat te slaan en presies met dieselfde voorkoms oor te bou van beter materiaal as dit ouer as 60 jaar is,” verduidelik ’n bou-inspekteur. En dit het in baie gevalle gebeur. Dit is sleg as klammigheid in die mure optrek en alles muf begin ruik. So ook as die waterpype in die mure begin lek, of as die bedrading onveilig is.
Die Israeliete was nog op trek na die beloofde land, en almal het in tente gewoon. Hulle het egter verwag om die huise wat hulle in daardie land sou verower as hul eie te betrek. Hulle het nie geweet wat hulle sou kry nie. Hierdie laaste deel van die wetboek moes hulle dus help om ’n veilige huis vir hulle en hul gesin te verseker.
Ons almal verlang na ’n veilige huis om ’n gelukkige gesin in groot te maak. Maar nie net die konstruksie van die mure hou gevaar in nie. Sommige gevare kom ons huise deur die radio en TV binne. Dit kan deur die internet of selfone ons kinders se karakter en sedes aanval. Dit kan ons deur ons leesstof of rolprente breinspoel en ons van ons geloof beroof. Pas op!
GEBED: Here, help ons om ons huis vir ons kinders te beveilig.
Lees vanaand in Levitikus 14:48-57 hoe die Israeliete verseker is dat hul huis veilig is om in te woon.
Donderdag 22 Januarie 2015 • Lees eers Levitikus 15:1-18
Veilige seks
Wanneer ’n man en ’n vrou geslagtelike omgang gehad het, moet altwee bad. Hulle is die res van die dag onrein (15:18).
GESELSVRAAG:
Wat is die geheim van veilige seks?
“Is dit regtig nodig om oor sulke dinge in die Bybel te skryf?” wonder jy dalk. Ons wil nie graag sulke gedeeltes saam met ons kinders lees nie – dit gee aanleiding tot te veel vrae wat ons moeilik vind om te beantwoord. In ’n opname is bevind dat die meeste kinders geen geslagsvoorligting van hul ouers gekry het nie – alles wat hulle weet, het hulle by hul maats gehoor.
Die heidense volke deur wie die Israeliete getrek het, het onsedelik gelewe. Prostitusie en egbreuk was deel van hul godsdiens om só vrugbare oeste te probeer verseker. Indien die Israeliete hul voorbeeld sou volg, sou seksueeloordraagbare siektes die volk vernietig. God wil sy mense veilig hou. Seks is ’n gawe van God – dit is voor die sondeval gegee – maar dit is net veilig binne ’n huwelik waar albei aan mekaar getrou bly.
In ons tyd is daar te veel mense wat hulle nie aan God se gebooie steur nie. Ontrou in die huwelik veroorsaak dat hulle dodelike siektes soos vigs opdoen en in die huwelik indra. Die miljoene weeskinders in ons land en duisende huisgesinne met kinders as hoof is getuie hiervan. Hul ouers is deur ontrou vernietig. Wat is die toekoms van sulke kinders? Die ouer kinders verkoop hul liggame om vir die ander te sorg. En sterf self.
GEBED: Here, bewaar ons gesin van al hierdie gevare.
Lees vanaand in Levitikus 15:19-33 watter reëls vir vroue gegeld het om die Israeliete gesond te hou.
Vrydag 23 Januarie 2015 • Lees eers Levitikus 16:1-10
Onheilige bidders
Hy offer dan eers die bul wat vir homself bedoel is as sondeoffer, sodat hy versoening kan doen vir homself en al die priesters (16:6).
GESELSVRAAG:
Hoe raak ons van ons sonde ontslae?
“Wie mag die berg van die Here opgaan en wie mag in sy heiligdom gaan staan? Dié een wie se hande rein en wie se hart suiwer is …” sing Dawid in Psalm 24:3-4. Hy was baie bewus daarvan dat God heilig is en dat ons ons vir ons ontmoeting met die Here moet voorberei. Dit het hy geleer uit die bepalings van die Groot Versoendag waarvan ons hier in Levitikus lees.
Aäron se twee seuns het gedink hulle is goed genoeg om sommer sonder eerbied die Allerheiligste binne te gaan. Dit het hul lewe gekos. Nou word Aäron geleer hoe om die heiligheid van God te respekteer. Voordat hy en die priesters vir die volk kon bid, moes hulle eers versoening doen vir hul eie sondes. Anders sou hul sondes ’n skeidsmuur vorm tussen hulle en God, sodat hul gebede nie verhoor sou word nie (vgl Jes 59:1-2).
Hierdie gedeelte moet saam met Hebreërs 9 en 10 gelees word. Dáár verduidelik die Bybel dat die offers van die Groot Versoendag maar net die voorbeeld was van die eintlike finale offer wat die pad na die Here vir elke bidder oopgemaak het. Jesus is die finale hoëpriester en die finale offer (vgl Heb 7:24-25; 10:14). Nou kan ons elkeen met vrymoedigheid self na God gaan en self bid (vgl 1 Joh 5:14). Ons het nie meer ander offers en priesters nodig nie.
GEBED: Dankie dat U vir ons die pad na God oopmaak, Here.
Lees vanaand in Levitikus 16:11-19 hoe Aäron vir die volk se sondes versoening moes doen.
Saterdag 24 Januarie 2105 • Lees eers Levitikus 16:20-22
Die sondebok
Terwyl hy dan sy twee hande op die kop van die bok lê, moet hy ál die oortredinge en opstandigheid, al die sondes van die Israeliete daar bo-oor die bok bely (16:21).
GESELSVRAAG:
Hoekom soek ons ’n sondebok as iets verkeerd loop?
“Dis nie ek nie, dis Sussie,” is enige kind gou om te sê as iets verkeerd loop. Ons ontken so graag ons eie skuld en pak dit op iemand anders, wat dikwels van geen sout of water weet nie. By die werk gebeur dit ook maklik. Ons soek ’n sondebok, nie ’n oplossing vir die probleem nie. Dit is altyd iemand anders se skuld.
Nadat Aäron vir sy eie sondes en dié van die ander priesters versoening gedoen het, moes hy die twee bokke voorberei as simbool dat die sondes van die volk weggeneem word. Daarom word die een bok geoffer en die ander een weggestuur die wildernis in, as simbool dat die sondes van die volk wat oor hom bely is, almal weggeneem is.
Die bloed van diere kan natuurlik nie vir ons sondes betaal nie (vgl Heb 10:4). Maar sonder bloedvergieting is vergifnis van sonde nie moontlik nie (vgl Heb 9:22). Daarom moes Jesus met sý bloed eens en vir altyd vir al ons sondes betaal (vgl Heb 10:14). Nou kan ons met vrymoedigheid na God toe gaan (vgl Heb 10:22). Dit is wonderlik om te weet dat Jesus vir al ons sondes voorsiening gemaak het. Kom ons loof Hom daarvoor.
GEBED: Here Jesus, dankie dat U ook my sondes weggeneem het.
Lees vanaand in Levitikus 16:23-34 hoe die Groot Versoendag elke jaar gevier is om die volk gereeld aan hul sondes te herinner.
Sondag