Җәмилә,
Җәй көннәре ямьле лә.
Ай-ли, Җәмилә,
Җәй көннәре ямьле лә.
Күмербәков керә.
Күмербәков. Исәнмесез! Здрастуйте!
Зөлхиҗә. Исән әлегә.
Күмербәков. Ярый, апа, гел исән бул. (Агачлыкка юнәлә.) Будь здорова.
Зөлхиҗә. Анда ярамый.
Күмербәков. Нәрсә ярамый? Почему? Ни булган?
Зөлхиҗә. Бу әбрәкәй түгел.
Күмербәков. Вижу.
Зөлхиҗә. Күргәчтен, нигә анда таба барасың?
Күмербәков. Соң, кирәк бит. Надо, апа.
Зөлхиҗә. Ярамый.
Күмербәков. Мин моннан ничә ел үтеп йөрим, можно было.
Зөлхиҗә. Түздек, түздек тә, түземлегебез бетте. Әбрәкәйдә яшәгән кебек яшибез.
Күмербәков. Запах что ли?
Зөлхиҗә. Әллә сизмисеңме?
Күмербәков. Да-а-а. Минем ни бит, апа, кече йомыш кына. Малая нужда.
Зөлхиҗә. Барып җиткәнче түзәрсең.
Күмербәков. Мин пожарга чабам. Константиновкада пожар. Пожарда бәдрәф кайгысы юк. Пожарный мин, апа. Поняла, пожарный.
Зөлхиҗә. Пожар булгач, нәрсә телеңә салынып торасың, чап.
Күмербәков. Пожарныйларның башлыгы мин. Соңрак барсам да ярый. Анда егетләр эшли.
Зөлхиҗә. Ярамый.
Күмербәков. Миндә простата, апа.
Зөлхиҗә. Анысы нәрсә тагын?
Күмербәков. Такая болезнь. Бәдрәфкә еш йөгертә торган чир.
Зөлхиҗә. Ир кешедер бит син. Кече йомыш өчен агач арасына кермәскә дә була. Хатын-кыз кебек чүгәләп торасы юк. Машинаң янына басып, моторын караган бул да…
Күмербәков (көлеп). Бер дә белмәгәнең юк икән.
Зөлхиҗә. Барысын да күргән. Бар, юлыңда бул. Пожарың янып бетмәсен.
Гыйбадулла керә.
Гыйбадулла. Нәрсә монда?
Зөлхиҗә. Менә, тыңламый.
Гыйбадулла. Ә-ә, бу бит өй янып беткәнне карап йөрүче.
Күмербәков. Сүндерүче мин, пожарный.
Гыйбадулла. Каенлык янганда сүндердегез инде.
Зөлхиҗә. Константиновка яна, ди, шунда чабам, ди.
Гыйбадулла. Алайса, суыңны монда әрәм итеп торма.
Күмербәков. Ярый кертмәсәң… Өегез янса, килеп тә карамыйм. Понял? (Китеп бара.)
Зөлхиҗә. Монда кызык нәрсә булды бит әле, Гыйбади. Кушкаен авылы кешесе туктады. Кайчандыр мине ошаткан булган икән. Финансыга укыдым, ди. Казахстанда эшләдем, ди, хәзер районга кайттым, ди.
Гыйбадулла. Салымгалиевтер инде. Налуг җыючы.
Зөлхиҗә. И-и-и, карале, белгән булсам…
Гыйбадулла. Белеп нишлисең?..
Зөлхиҗә. Соң, ни бит. Налуглар күбәйде бит.
Гыйбадулла. Ул нишли ала?
Зөлхиҗә. Бераз җиңеләйтер иде.
Гыйбадулла. Башың бармы синең? Ул ничек җиңеләйтсен, налугны Мәскәү сала. Әнә Мәскәвенә барып пес итсен.
Зөлхиҗә. И, алай сөйләшмә инде, Гыйбади. Чибәр идең, ди. Хәзер дә чибәр, ди.
Гыйбадулла. Ияреп китәсең калган. Сартир саклап утырмас идең.
Зөлхиҗә. Юк инде, синнән китеп, беркая да барасым юк. Налуг җыючыга бигрәк тә. Аларга бит кеше рәнҗеше төшәдер. Кешеләрне җылатып…
Ай-ли, Җәмилә,
Җәй көннәре ямьле лә.
Ай-ли, Җәмилә,
Җәй көннәре ямьле лә.
Өебезне