Piekfyn Afrikaans Leesboek Graad 7 Huistaal. Riens Vosloo

      Verteller

      In hedendaagse kortverhale kan die hoofkarakter ook dikwels as die ek-verteller optree. Meeste kortverhale word in die derdepersoon geskryf.

      Die tema (motief of kernidee)

      ’n Kortverhaal het gewoonlik net een motief of kerngedagte. Vra jouself die vraag: Waaroor gaan dit in hierdie verhaal?

      Intrige

      Die intrige is die patroon van gebeure in ’n verhaal. Dit kan kortliks soos volg voorgestel word:

       Die probleem of uiteensetting: Dit bepaal die hoofkarakter se probleem en dinge wat tot die gebeure aanleiding gee.

       Konflik: Die sentrale gebeurtenis, wat die hoofkarakter in ’n stryd met homself of met ’n ander karakter betrek, en oploop na die hoogtepunt.

       Ontknoping: Die einde van die verhaal, en ’n gemotiveerde oplossing.

      Tyd

      Tyd is die ordening van die verloop van gebeure. Dit is die tydperk waarin die verhaal afspeel, byvoorbeeld een dag, twee maande, ensovoorts. Die tyd van ’n kortverhaal hou ook gewoonlik verband met die tema en die ruimte.

      Ruimte, agtergrond

      Dit is die fisiese agtergrond of tydperk waarin die verhaal afspeel. Die plek en omstandighede kan bydra tot die tema, atmosfeer en karakterisering.

      Toon

      Dit is die atmosfeer wat in die verhaal heers. Sekere woordkeuses bevorder die stemming en beskryf die omstandighede/situasie en die skrywer se gevoelens daaroor.

      Taal en styl

      Styl is die manier waarop die taal aangebied word. Woordkeuse, sinslengte en sinstruktuur dra by om ’n bepaalde atmosfeer te skep.