ons in vandag se geskiedenis sal sien. Hoe weet ’n mens wat die regte ding is om te doen? Wanneer moet jy nie met jou vriende saamgaan nie? Kyk net na jou (en hul) motiewe, dan sal jy weet.
Balak het nie nodig gehad om vir die Israeliete bang te wees nie. Die Here het hulle belet om vir Moab (die afstammelinge van Lot) aan te val (vgl. Deut 2:9). Hulle was egter baie bang. Hulle soek dus iemand wat gesag by God het, wat die volk kan vervloek. Hulle het gehoor van Bileam, wat ’n groot reputasie gehad het. Hy het God se stem gehoor. Wat hy sê, sou gebeur. Dus stuur Balak ’n afvaardiging na Bileam. Die Here belet hom om saam te gaan en die gestuurdes moes met leë hande teruggaan.
Bileam het duidelik geweet wat die Here se antwoord was, maar hy gee net die eerste deel (vgl. v. 12). Hy los die deur oop vir ’n beter aanbod. Petrus sê dit was uit geldgierigheid (vgl. 2 Pet 2:15). Geldgierigheid bly vandag nog steeds ’n bron van baie verkeerde besluite. Verkeerde vriende kan ons so maklik oortuig om die verkeerde ding te doen, tot ons nadeel.
GEBED: Here, bewaar my van verkeerde motiewe en om die verkeerde ding uit geldgierigheid te doen.
Lees vanaand in Numeri 22:13-21 hoe die versoekings soms al sterker word hoe langer jy daaroor nadink.
SATERDAG 13 FEBRUARIE 2016
Lees eers Numeri 22:22-35
Op ’n gevaarlike pad
Ek sien jy is op ’n gevaarlike pad (22:32).
GESELSVRAAG: Watter paaie is deesdae gevaarlik om te gebruik?
“Ek het vandag amper ’n rewolwer vir jou gekoop,” vertel ’n liewe ou tannie aan haar man. “’n Man het dit by my motor se venster aan my gewys, maar toe word die lig groen en ek moes ry.” Sy het nie besef dat sy amper die slagoffer van ’n motorkaping was nie. So beland ons almal in gevaarlike situasies sonder om dit te beplan of selfs te besef.
Bileam het homself oortuig dat hy wel saam met Balak se manne kon gaan, noudat hy ’n beter aanbod gekry het. Die Here het nie daarvan gehou nie en sy lewe was verskeie kere in gevaar. Die donkie het die gevaar gesien, maar die profeet nie. Dit was eers toe die donkie begin terugpraat dat die profeet besef hier is iets bonatuurliks aan die gang. Die Here het hom dus gewaarsku om net te sê wat die Here sê en niks anders nie.
Hoe meer ’n mens na die verleidelike stem van die versoeking luister, hoe meer oortuig jy jou dat dit nie regtig so verkeerd is nie. Daardie een drankie sal mos nie skade doen nie. Daardie een keer se eksperimenteer met dwelms is mos net om te weet waarvan die mense praat. Daardie aanbod van die sakeman is nie regtig korrupsie nie, dit wys net dat hy baie van my hou. Ek flankeer net ’n bietjie met die ander vrou se man – sommer net uit vriendelikheid.
GEBED: Here, help my om die gevaar betyds raak te sien en dan ten volle aan U gehoorsaam te wees.
Lees vanaand in Numeri 22:36-41 hoe Bileam en Balak by die groot toets kom. Wat sou jy in Bileam se plek gedoen het?
SONDAG 14 FEBRUARIE 2016
Lees eers Psalm 80:1-8
Here, red ons!
Almagtige God, laat dit weer met ons goed gaan, verskyn tog tot ons redding! (80:8).
GESELSVRAAG: Watter gevare kan ons hierdie week bedreig?
“Die lewe bly maar ’n stryd,” sug ’n kollega. Dit lyk asof daar elke dag maar net meer probleme is. “Die werk van ’n bestuurder is om probleme op te los,” vertel ’n sakeman. “Daarom begin ek elke dag met die vraag: Wat is vandag se probleme?” Sodra ’n mens die Here se kant kies, kan jy verwag dat die vyand ook meer aandag aan jou sal gee, want jy word dan vir hom ’n bedreiging.
Asaf het dit ook ervaar. Daarom gaan sy psalm, soos so baie ander, oor die daaglikse stryd waarin elkeen van ons staan. Hy onthou nog die tye toe dinge goed gegaan het, maar nou begin die baie probleme hom oorweldig. Dit voel vir hom asof almal teen hom is. Waar kan hy nou hulp gaan soek?
Hy het ervaar dat hy in alle omstandighede by die Here hulp kan soek en kry. Daarom het ons almal ’n Sondag nodig wanneer ons kan stil word by die Here en die afgelope week met Hom kan bespreek. Hy weet ook wat hierdie week vir ons voorlê. Ons kan Hom dus vertrou om ons daarvoor voor te berei. Dit is wonderlik om te weet dat ons hierdie week nie ’n millimeter sal kan beweeg waar die Here nie is nie. Al stel ons Hom baie keer teleur, verander sy liefde vir ons nie. Kom ons gebruik vandag om by Hom te bly.
GEBED: Here, dankie dat ek U mag ken in ’n tyd van baie probleme en teenstand. Bewaar my en ons gesin van alle gevare.
Lees vanaand in Psalm 80:9-20 hoe ons die Here se bewaring op alle gebiede nodig het.
MAANDAG 15 FEBRUARIE 2016
Lees eers Numeri 23:1-12
Goeie ideaal
Mag ek ook eendag as opregte sterwe, mag my einde soos hierdie volk s’n wees (23:10).
GESELSVRAAG: Wat moet eendag op jou grafsteen staan?
“Ek dink nie ons het ’n idee wat agter die skerms in die geestelike wêreld gebeur nie,” sê ’n vriend wat een van Frank Peretti se boeke gelees het. Indien ons besef het wat die krag van gebed is, sou ons baie meer tyd daaraan bestee het. Ons vyand weet dit baie goed, geen wonder dat hy enigiets sal doen om ons te keer om te bid nie.
Balak het geglo dat gebed ’n verskil maak. Daarom het hy gedink dat hy God kan omkoop deur sy offers, soos ons vandag gelees het. Hy wou vir God voorskryf wat Hy moes doen. God werk nie so nie. Bileam het dit geweet, en hy het elke keer die ware boodskap ontvang en oorgedra, sonder vrees vir Balak of om te dink aan die groot beloning as hy iets sou doen of sê waarvan Balak gehou het. Bileam se ideaal was om as ’n opregte mens te sterwe. Tog lees ons dat hy uiteindelik tussen die goddelose gesterf het (vgl. Num 31:8). Toe hy nie ’n vloek oor Israel kon uitspreek nie, het hy vir geld vir Balak geleer hoe om die Israeliete te verlei (vgl. Op 2:14).
Ons het almal mooi drome en ideale vir die toekoms. Baie van ons het mooi begin, soos Bileam, maar langs die pad rigting verloor. Kom ons stel ons kompas opnuut op die Here in. Vir die ewigheid.
GEBED: Here, U ken elke versoeking waarmee ons vandag te doen sal kry. Help ons om reg te luister en reg te kies.
Lees vanaand in Numeri 23:13-17 hoe die bygelowige Balak planne maak om Israel geestelik te oorwin.
DINSDAG 16 FEBRUARIE 2016
Lees eers Numeri 23:18-26
God verander nie
God is nie ’n mens dat Hy sou lieg nie, ’n mens dat Hy van gedagte sou verander nie. Sou Hy iets sê en dit nie doen nie, iets belowe en dit nie uitvoer nie? (23:19).
GESELSVRAAG: Wat sou ons graag aan God wou verander?
“As ek God was, sou ek dinge darem heel anders gedoen het,” sê ’n jongman. Baie van ons sal dalk met hom saamstem. Ons sou sonde mos dadelik straf en alle gebede dadelik verhoor. Maar hoe gemaak as die een boer bid vir reën en die buurman bid dat dit nie moet reën nie? Ons maak uit onkunde baie foute, ook wanneer ons mense so maklik veroordeel. Weet God op die ou end dalk regtig die beste?
Balak het geweet dat God vir Israel uit Egipte laat trek het (vgl. v. 23). Hy het gedink hy kon God omkoop om teen sy eie volk te draai. Bileam se uitspraak is duidelik. As God in beheer is, kan jy Hom nie van plan laat verander nie. Dit is óns wat moet verander om in ooreenstemming met sy wil te kom. Ons kan nie God se wil verander deur toewyding en vas nie. Hy kan ons egter verander en daarna sy wil laat geskied. Bileam wou bloot doen en sê wat die Here aan hom geopenbaar het (vgl. v. 26).
Het dit dan enige sin om te bid? Beslis! God het baie beloftes aan gebed geknoop. Hy maak sy wil in die Bybel aan ons bekend. As ons volgens sy wil bid, sal Hy ons verhoor (vgl. Joh 14:13-14; 15:16).
GEBED: