Lees vanaand in Numeri 23:27-30 hoe Balak steeds dink dat hy deur omkopery en toordery die oorwinning kan behaal.
WOENSDAG 17 FEBRUARIE 2016
Lees eers Numeri 24:1-9
Hoor en sien vergaan
… die openbaring aan een wat die woorde van God hoor, wat sien wat die Almagtige hom laat sien, wat in gebed neerval, en sy oë word geopen (24:4).
GESELSVRAAG: Hoe kan ons God se werk raaksien?
“Dat hoor en sien vergaan,” beskryf gewoonlik ’n erg raserige plek. Dit het al gebeur dat my vrou uit ’n byeenkoms vlug as die lof- en aanbiddinggroep se luidsprekerstelsel uitermate hard gedraai is. Baie jongmense se gehoor word permanent beskadig deur die harde musiek waarna hulle luister. (In die ou dae is jou doofheid aan die knal van jou geweer gewyt.)
Hoewel Bileam nie ’n Israeliet was nie, het hy die gawe gehad om na die stem van die Here te luister. Wanneer hy bid, word sy oë geopen, sê hy in vandag se kernvers. Daarom seën hy Israel nou sommer uit sy eie. Hy het nie nodig gehad om nog offers te bring of te bid nie. God se wil was vir hom glashelder en duidelik.
Hoe sou ons nie wens om daardie gawe te kon hê nie. Ons soek so dikwels God se leiding, maar kry nie duidelike antwoorde nie. Bileam se gawe het hom nie veel gehelp nie. Uiteindelik sou die mense aan hom dink as die verleier, nie die bidder nie. Hy kon so maklik ’n goeie reputasie nagelaat het, maar hy het dit weggegooi. Kan dit wees dat ons ook reg begin, maar verkeerd eindig? Ons kan nie ons verlede verander nie, maar ons toekoms wel.
GEBED: Here, help my om vandag na die leiding van die Heilige Gees te luister en daaraan gehoorsaam te wees.
Lees vanaand in Numeri 24:10-14 hoe Balak se planne in sy gesig ontplof het.
DONDERDAG 18 FEBRUARIE 2016
Lees eers Numeri 24:15-19
Die ster uit Jakob
Ek sien hom, maar hy kom nie nou al nie, ek kyk na hom, maar hy is nie naby nie, daar kom ’n ster uit Jakob, daar staan ’n heerser in Israel op (24:17).
GESELSVRAAG: Wanneer word iemand as ’n ster beskou?
“Jy is ’n ster,” sê my skoondogter vir haar kind nadat sy die soveelste medalje as die uitblinkerspeler van haar yshokkiespan ontvang het. So word ook graadeentjies beloon met sterre wanneer hulle hul huiswerk goed doen. Dikwels word iemand wat op watter vlak ook al uitblink, as ’n ster beskryf. Ongelukkig soms as ’n verskietende ster!
Die toekoms van die volk word aan Bileam geopenbaar. Hy sien ’n groot leier kom. Hy noem hom ’n ster. Vereers kan dit verwys na die tyd van koning Dawid, 300 jaar later, toe die volke wat in dié profesie genoem word, deur Israel oorwin is. Skrifverklaarders meen dat daar ook ’n verdere vervulling is in die koms van die Messias. Dit is opmerklik dat die sterrekykers wat ná Jesus se geboorte in Betlehem opgedaag het, juis uit dieselfde streek as Bileam gekom het. Hierdie profesie deur ’n heiden kan dus reeds na Jesus Christus verwys.
Dit nie genoeg om bloot die Woord van God te ken nie. Jy moet dit aanvaar en daarvolgens optree. As die Bybel nie jou lewe verander nie, is dit vir jou nutteloos.
GEBED: Here, gee dat u Woord elke dag my lewe sal verander om ál meer soos Christus te wees.
Lees vanaand in Numeri 24:20-25 hoe Bileam ’n kykie in die toekoms van die omringende volke gekry het.
VRYDAG 19 FEBRUARIE 2016
Lees eers Numeri 25:1-9
Verleiding
Dit het gebeur toe die mans deur die Moabitiese vrouens uitgenooi is na die offers ter ere van hulle gode (25:2).
GESELSVRAAG: Waarom bevat so baie advertensies prente van vroue?
“Die Here het eerste vir Adam gemaak. Toe kyk Hy na hom en dink: ‘Nee, Ek kan beter doen as dit.’ Toe maak Hy vir Eva,” sê ’n vriendin. “Wat het Adam gesê toe hy Eva vir die eerste keer gesien het? Hy het gesê: ‘Uiteindelik!’ ” skerts ’n jeugleraar in ’n preek (vgl. Gen 2:23, 1953/1933-vertaling). Hoe ook al, dit is duidelik dat ’n vrou gemaak is om die manne se aandag te trek. Seker ook dié dat advertensies met mooi meisies meer aandag trek as ander. Volgens navorsing geld dit ook vir voorblaaie van tydskrifte.
Dit staan nie presies so hier in Numeri nie, maar die Bybel sê dit was op advies van Bileam dat die Moabitiese vroue die manne deur buite-huwelikse seks verlei het om saam met hulle die afgode te vereer (vgl. Op 2:14). Die gevolg was dat 24 000 Israeliese mans gesterf het (vgl. v. 9). Israel was totaal onbewus van die geestelike stryd wat in die berge rondom hulle gewoed het.
Dit is niks nuuts nie. Selfs vandag word huwelike opgebreek, selfs van leraars, deurdat hulle aan seksuele versoekings toegee. Die duiwel span God se pragtigste skepping in om mense te verlei. Nietemin gebruik God die vrou as beeld van sy bruid, die kerk (vgl. 2 Kor 11:2; Op 19:7). Aan wie se kant is jy?
GEBED: Here Jesus, dankie vir die voorreg om deel van u bruid op aarde te wees. Heilig my, tot u eer.
Lees vanaand in Numeri 25:10-18 hoe die Israeliete en die Moabiete gestraf is vir hierdie sonde.
SATERDAG 20 FEBRUARIE 2016
Lees eers Numeri 26:1-18
Die tweede sensus
Neem ’n sensus op van die hele volk Israel, van elke Israeliet van twintig jaar en ouer wat vir militêre diens geskik is (26:2).
GESELSVRAAG: Wat is die nut van ’n sensus?
“Kyk wat jy kan meet in elkeen van jou Kritieke Prestasie-areas,” het ons geleer by die kundiges wat ons met strategiese beplanning gehelp het. “As jy nie meet nie, sal jy nie weet nie,” is herhaaldelik by ons ingedril. Elke personeellid het dus gaan kyk watter belangrike dinge gemeet moes word, sodat ons presies geweet het hoe ons vorder. Net so meet elke atleet gereeld presies hoe ver hy die diskus gooi of hoe vinnig hy die 100-meter-wedloop voltooi. Sonder metings kan ons nie weet of ons vorder nie.
Die Here het vir Moses dieselfde les geleer. Hy moes weer die volk tel, soos aan die begin van die boek Numeri. Dit was nou 40 jaar later. Al die ongehoorsames het uitgesterf. Het die volk gegroei of gekrimp deur die woestyn-ervaring? Hoe groot is elke stam nou? Dit sou help om te bepaal hoeveel grond elke stam in die beloofde land sou nodig hê.
Jesus sê ons moet mooi dink wat dit sal kos om Hom te volg (vgl. Luk 14:28-33). Is jy gewillig om alles prys te gee ter wille van Hom? Indien nie, is jy nie geskik om Hom te volg nie. Eina! Dit is duidelik dat die meeste van ons nog ver het om te gaan. Die Here moet elke dag met ons werk. Hoe vorder ons?
GEBED: Here, help my om geestelik te vorder, al is dit moeilik om te meet. Ek wil vir U ’n verskil maak hier waar ek is.
Lees vanaand in Numeri 26:19-51 wat die uitslag van die sensus was. Wat kan ons vandag in ons gemeente meet? Was daar groei?
SONDAG 21 FEBRUARIE 2016
Lees eers Psalm 81:1-11
Kom na My toe
Wat julle nodig het, sal Ek in oorvloed gee (81:11).
GESELSVRAAG: Wat wil jy hê moet vandag in die kerk gebeur?
“Kom ons speel kerk-kerk,” hoor ’n mamma haar kinders sê. Sy was dankbaar dat haar opvoeding sulke pragtige vrug oplewer, totdat die kinders begin rondhardloop en op mekaar skree: “Maak gou, ons is laat! Waar is jou skoene? Kam jou hare en was jou gesig! Trek jou aan! Wat sal die mense van ons dink as ons laat inkom?”
Asaf se lied herinner ons dat musiek ’n groot deel van ons aanbidding is. Ook dat ons ons werkgereedskap moet neersit en onthou wat die