Uit die Beek 2016. Attie van Wijk

      Hierdie psalm herinner die Here aan die oorwinnings van die verlede. Asaf gebruik beelde uit die natuur om die Here te vra om dit weer te doen. Die doel was dat almal moes weet dat daar net een Here is. Dit is dan ook die opdrag aan die Here se kerk. Elke volksgroep moet die evangelie hoor. Daar is nog 7 000 volksgroepe wat geen kerk het nie.

      Wat is die hoofdoel van die kerk? Is dit om een maal per week bymekaar te kom en mekaar warm te broei? Of is dit om uit te gaan en ’n verskil te maak in ’n wêreld sonder hoop en sonder God? Ons moet ons hoofopdrag altyd eerste stel.

      GEBED: Here, dankie dat ek deel van u kerk mag wees. Gebruik ons om u koninkryk wêreldwyd te laat kom.

      Lees vanaand in Psalm 84:1-8 hoe dit goed gaan met mense wat tuis voel in die Here se huis.

      MAANDAG 7 MAART 2016

      Lees eers Numeri 35:1-8

      Lewende Bybels

      Sê vir die Israeliete hulle moet in die gebiede wat hulle besit, vir die Leviete stede gee om in te woon, en ook weiveld rondom die stede (35:2).

      GESELSVRAAG: Hoekom het ’n gemeente ’n leraar nodig?

      “Ons het net een Bybel vir die hele gemeente,” vertel ’n Sjinese leraar. “Ons het dus die Bybel in klein seksies opgesny en elke lidmaat moes ’n seksie memoriseer. Dan sou ons die hele Bybel hê as dit dalk gekonfiskeer word.” Sê nou maar jy moes Numeri memoriseer! “Toe ek in Rusland gearresteer is omdat ek Bybels die land ingeneem het, het ek my voorgeneem om groot dele van die Bybel te memoriseer,” vertel ’n Afrikaanse predikant.

      Die Israeliete het nie Bybels besit nie. Moses was nog besig om die eerste gedeelte van die Ou Testament te skryf. Dit is eers baie later met die hand oorgeskryf sodat elke stam en later elke sinagoge ’n afskrif van die Skrif kon hê. Hoe kon die Israeliete dus weet wat om te doen en hoe om te lewe? Die Leviete moes dit memoriseer en aan hulle oordra. Daarom moes elke stam lewende Bybels in die vorm van Leviete hê om hulle te onderrig.

      Ongelukkig memoriseer baie mense nie meer Bybelverse nie. Hulle is dus ongewapen wanneer die versoeker hulle probeer verlei. Kom ons memoriseer elke dag ’n gedeelte.

      GEBED: Here, help my om elke dag ’n deel van u Woord in my hart te bêre sodat ek gewapen kan wees.

      Lees vanaand in Numeri 35:9-21 hoekom asielstede as plekke van veiligheid voorberei moes word.

      DINSDAG 8 MAART 2016

      Lees eers Numeri 35:22-28

      Die Gesalfde

      Dáár moet hy bly totdat die hoëpriester, die man wat met gewyde olie gesalf is, gesterf het (35:25).

      GESELSVRAAG: Hoe word manslag deesdae hanteer?

      “Die verskil tussen manslag en moord is of jy vooraf beplan om iemand te vermoor. As jy iemand per ongeluk doodmaak sonder om dit te bedoel, is dit manslag,” verduidelik iemand dié terme vir my. “As jy onverskillig was, kan dit strafbare manslag wees.” Jy het mos geweet dat jou optrede gevaarlik vir ander mense kan wees.

      Die kultuur van daardie tyd was wraak en weerwraak, soos nou nog in sommige lande. Die Here het dus ’n beter manier voorgestel: Maak eers seker of die skuldige werklik bedoel het om die ander man dood te maak. Indien dit ’n geval van manslag is, kon hy veilig in die asielstad bly totdat die heersende hoëpriester gesterf het. Daarna kon hy sonder vrees terugkeer na sy familie.

      Dit is opmerklik dat vergifnis afgehang het van die dood van die gesalfde. Christus (die “Gesalfde”) het deur sy dood die pad na volkome vergifnis oopgemaak – selfs vir mense wat opsetlik moord gepleeg het. Hy is die ewige hoëpriester (vgl. Heb 6:20). Toe Hy sterf, het die voorhangsel geskeur as simbool dat die pad na God nou vir almal oop is (vgl. Matt 27:51). God red ons uit genade, nie deur ons verdienste nie. As jy vergifnis ontvang het, moet jy op jou beurt ook vergifnis gee.

      GEBED: Dankie dat U vir ons die pad na vergifnis oopgemaak het, Here Jesus. Help my daarvolgens lewe.

      Lees vanaand in Numeri 35:29-34 hoe moord regverdig geoordeel en gestraf moes word.

      WOENSDAG 9 MAART 2016

      Lees eers Numeri 36:1-4

      Eie belang

      So sal die grond wat aan ons toegewys is, van ons weggeneem word (36:3).

      GESELSVRAAG: Wat was die hoofdoel van die Groepsgebiedewet?

      “Sedert groepsgebiede opgehef is, word die middestad van Johannesburg deur vreemdelinge beset en het die stadsentrum verval,” lees ek in ’n e-pos. Mense is bekommerd dat hul eiendomme se waarde sal daal. Hulle vergeet dat die Groepsgebiedewet groot hartseer en skade veroorsaak het omdat mense se eiendom summier afgevat is. Erfgrond raak mense emosioneel.

      Die familiehoofde van die stam van Manasse het seker lang debatte om die kampvuur gevoer oor die nuwe verwikkelinge rakende die dogters van Selofgad. Hulle het vrede dat die dogters soos seuns kon erf, maar sê nou hulle trou met ’n man uit ’n ander stam? Dan word hul erfgrond deel van ’n ander stam se grondgebied, selfs in die Jubeljaar. Groot ontsteltenis, al het hulle toe nog geen sentimeter grond in die beloofde land besit nie.

      Ons erfgrond is vir ons belangrik. Tog vergeet ons dat dit alles maar net tydelik is. Ons eintlike erfdeel is nie hier nie, maar in die hemel (vgl. 1 Pet 1:4; Kol 1:12). Ons moet dus in die eerste plek seker maak dat ons en ons nageslag nie die eintlike erfenis misloop nie.

      GEBED: Here, vergewe dat ons so vas is aan hierdie aarde. Dankie vir ons eintlike erfenis in die ewigheid.

      Lees vanaand in Numeri 36:5-13 hoe die probleem van dogters se erfreg toe opgelos is. Ons groet vanaand vir Numeri.