GESELSVRAAG:
Waarvan moet ons alles vrygemaak word?
“Ons gemeente moes drie kinders stuur om vir dwelmverslawing behandel te word, teen R40 000 elk,” vertel ’n leraar. Min van hulle word werklik permanent vry. Daarom is dit so gevaarlik om selfs net een keer met ’n dwelm soos tik te eksperimenteer. Jy raak dadelik verslaaf en dit bly ’n lewenslange stryd, selfs met die nodige hulp. Net die Here kan ons vrymaak (vgl Joh 8:36).
Paulus praat hier nie bloot van die verslawing aan middels nie. Hy bedoel veral verslawing aan ’n wettiese godsdiens. Baie mense word vasgevang in die een of ander kultus en verloor hul vryheid. Hulle word gebreinspoel. Hulle behoort ten volle aan die kultusleier. Christus is anders. As jy aan Hom behoort, is jy waarlik vry. Jy draai jou rug vir die ou lewe en begin om voluit in die nuwe vryheid te lewe.
Ons kan maklik op ander neersien en dink dat ons anders is. Die groot toets is egter of jy op Christus alleen vertrou vir die ewigheid. Of vertrou jy op Christus plus nog iets? Christus plus ’n sekere kerk? Christus plus die doop? Christus plus die gawes van die Gees? Christus plus gereelde sondebelydenis? Christus plus goeie werke? Christus plus onderhouding van die wet?
GEBED: Here Jesus, dankie dat U ons vrymaak van verdienste. Ons wil nou uit dankbaarheid vir U lewe.
Lees vanaand in Galasiërs 5:2-12 waarom uiterlike vormgodsdiens nutteloos is. Ons moet eerder op Christus vertrou.
Sondag 22 Februarie 2105 • Lees eers Psalm 30:1-6
Praktiese aanbidding
Here my God, ek het na U geroep om hulp en U het my gesond gemaak (30:3).
GESELSVRAAG:
Waarmee het ons vandag hulp nodig?
“Gisteraand was daar nog trane en vanmôre lag ek al weer,” lees ons in vers 6. Voel jy ook so? In die nag lyk dinge duister as ons op die bed lê en rondrol. Maar sodra die son opkom, sien ons weer kans vir die volgende skof. Daar is min van ons wat nie hierdie soort ding ken nie. Dit is maar deel van die lewe.
Dawid het hierdie lied gekomponeer om by die inwyding van die tempel gesing te word. Dis ’n duidelike bewys dat sy geloof baie met sy daaglikse lewe te doen het. Wanneer hy teenstand van mense ervaar, soek hy hulp by die Here. Wanneer hy siek is, doen hy dieselfde. Sy geloof en sy daaglikse lewe kan nie geskei word nie. Sy loflied gaan dus nie net oor God wat daar ver is nie, maar ook oor God wat elke dag by hom is. God is nie net vir Sondae nie, maar ook vir Maandae tot Saterdae.
“Ons eredienste het heeltemal verander sedert ek in die erediens plek gemaak het vir sake vir voorbidding,” vertel ’n kollega. Hy nooi mense om vorentoe te kom of om onderwerpe vir voorbidding vooraf aan hom te stuur. En dan bid hy vir elke persoon wat die vrymoedigheid gehad het. “En dis wonderlik hoe die Here ons gebede verhoor,” vertel hy verder. Jy het ook vandag ’n kans om jou bekommernisse na Hom te neem. Verwag jy dat iets gaan gebeur?
GEBED: Here, ek wil U loof – verhoor asseblief my gebed.
Lees vanaand in Psalm 30:7-13 hoe Dawid vertel van sy innerlike stryd en hoe die Here hom daarna blydskap gegee het.
Maandag 23 Februarie 2105 • Lees eers Galasiërs 5:13-18
Die oorwinningslewe
Laat julle lewe steeds deur die Gees van God beheers word, dan sal julle nooit swig voor begeertes van julle sondige natuur nie (5:16).
GESELSVRAAG:
Met watter verkeerde begeertes sukkel mense?
“Hoe gaan dit nou met jou, my vriend?” vra ’n sendeling aan ’n Indiaan wat sy lewe aan Christus oorgegee het. “Ek sien daar is nou twee wolwe hier in my binneste. ’n Goeie wolf en ’n slegte wolf. En hulle baklei,” was sy antwoord. “En watter een wen?” vra die sendeling. “Die een wat ek kos gee,” kom die antwoord.
Die dag as jy Christus aanneem, is dit nie die einde van die geveg nie. God se Gees kom in jou woon. Maar jou eie sondige natuur gee nie graag die beheer oor nie. Hy maak dat selfs Christene onder mekaar baklei (vgl v 14-15). Ons sondige natuur probeer keer dat God se krag ons lewe beheers. Maar as ons die beheer aan die Gees oorgee, verander ons radikaal. Ons staan nie meer onder die wet nie, maar ons is ook nie wetteloos nie (vgl v 18). Ons wil doen wat God wil, nie om daardeur gered te word nie, maar omdat ons dankbaar is vir alles wat Christus vir ons gedoen het.
Ken jy ook hierdie stryd? Moenie moedeloos word nie. Uit eie krag sal ons nooit God se wil kan doen nie. Daarom moet ons tot algehele oorgawe kom. Ons moet al die sleutels van ons lewe aan die Here oorgee. Hy wil ons hele lewe beheer en elke kamer skoonmaak (vgl v 25). Dan sal ons die vrug van die Gees dra.
GEBED: Here Jesus, ek kom gee my onvoorwaardelik aan u beheer oor. Heilig my, reinig my en vul my.
Lees vanaand in Galasiërs 5:19-26 hoe ons kan onderskei tussen die praktyke van ons sondige natuur en die vrug van die Gees.
Dinsdag 24 Februarie 2105 • Lees eers Galasiërs 6:1-10
Wat sal jy oes?
Moenie julleself mislei nie: God laat nie met Hom spot nie. Wat ’n mens saai, dit sal hy ook oes (6:7).
GESELSVRAAG:
Watter soort vrugte wil jy op die ou end dra?
“Die boer het vir my ’n papiersak vol pampoenpitte gegee en gewys hoe ek vier pitte in elke grondhopie moet plant. ‘En as jy klaar is, kan jy opgaan huis toe. Daar wag iets lekkers vir jou,’ het hy bygevoeg.” So vertel ou Loskop van die dae toe gevangenes nog toegelaat was om bedags op plase te gaan werk. “Ek het gemaak soos hy gesê het, maar die sak wou net nie leeg raak nie. Later het ek al hoe meer pitte in elke hopie geplant. Op die ou end het ek sommer ’n gat gemaak en die sak daarin leeggemaak. ’n Paar weke later sê die boer ons moet gaan kyk hoe my pampoenplante opkom. Elke hopie aan die begin van die land het vier plantjies gehad. Maar hoe verder ons geloop het, hoe meer plantjies was daar. Uiteindelik het hulle gestaan soos hare op ’n hond. Ek het skoon vergeet dat die pitte sou opkom!”
Ons vergeet ook dat alles wat ons doen of sê pitte is wat ons plant. Ons sal daarvan rekenskap moet gee (vgl v 5). As ons lewe soos die Gees ons lei, sal ons pragtige vrugte dra. Maar as ons die sondige natuur kans gee om oor te neem, sal ons met skande na die slegte gevolge daarvan kyk. Ons moet dus aan almal goed doen (vgl v 10). Dit is die teken dat die Heilige Gees in beheer is.
GEBED: Here, ek gee my aan U oor sodat U my kan verander om te wees wat U vir my beplan het.
Lees vanaand in Galasiërs 6:11-18 wat die belangrikste dinge in die gelowige se lewe moet wees. Is vers 14 van jou ook waar?
Welkom by 1 Samuel
Skrywer:
•Waarskynlik Samuel self tot by hoofstuk 25. Daarna onbekend. Sommige meen dit was die priester Abjatar.
Eerste lesers:
•Israel en Juda.
Datum:
•Samuel is omstreeks 1150 vC gebore. Die finale skrywer van die boek het geweet van die skeuring van die ryk in 931 vC.
Doel:
•Om te toon dat God in beheer van die geskiedenis is.
Hooftrekke:
•Herlewing onder Samuel se leiding (1-7).
•Saul word koning (8-15).
•Dawid tree na vore en Saul sterf (16-31).
Let op na:
•Die werk van die Heilige Gees in mense se lewe.
•Hoe God gebede verhoor.
•God kyk nie na die uiterlike nie, maar na die hart.
•God verkies gehoorsaamheid bo dankoffers.
•God beheer die verloop van die geskiedenis.
Christus in 1