Lees vanaand in Levitikus 27:26-34 dat ’n tiende van die kudde aan die Here gegee moet word.
Welkom by Galasiërs
Skrywer:
•Die apostel Paulus.
Eerste lesers:
•Galasië was die sentrale deel van die huidige Turkye. Die dorpe Antiogië, Ikonium, Listra en Derbe was in daardie streek.
Datum:
•Omstreeks 49 nC as dit ná die eerste sendingreis geskryf is, of omstreeks 56 nC as dit geskryf is ná Paulus se tweede sendingreis en die vergadering in Jerusalem (vgl Hand 15).
Doel:
•Sekere dwaalleraars het ná Paulus gekom en wou die nuwe gelowiges oortuig dat hulle ook soos die Jode besny moes word en die Joodse wette moes onderhou. Paulus verduidelik dat ons net uit genade gered word, nie deur wette te gehoorsaam nie.
Hooftrekke:
•Paulus verdedig sy gesag (1-2).
•Ons word net deur geloof vrygespreek (3-4).
•Christelike vryheid en verantwoordelikheid (5-6).
Let op na:
•Ons verlossing is nie afhanklik van goeie werke nie, maar is uit genade ontvang, deur geloof in Christus.
Christus in Galasiërs:
•Christus is die kern van die evangelie (1:7).
•Christus kom woon in die gelowige (2:20).
•Christus maak waarlik vry (2:4; 5:1).
•Christus se kruisdood maak ware vryheid moontlik (6:14).
Vrydag 13 Februarie 2105 • Lees eers Galasiërs 1:1-5
God roep jou
Ek is ook nie deur ’n mens aangestel nie, maar deur Jesus Christus en deur God die Vader wat Hom uit die dood opgewek het (1:1).
GESELSVRAAG:
Hoe roep die Here mense om in sy diens te staan?
“Hoe het die Here jou geroep om ’n sendeling te wees?” vra ’n vrou in ’n brief waarin sy my nooi om ’n sendingweek in hul gemeente te lei. Dit het my sommer baie jare laat terugdink aan hoe die Here in my lewe gewerk het om my te oortuig dat ek moes gaan werk waar mense die evangelie nodig het. Paulus het ook hierdie ervaring gehad. Hy wou gaan waar niemand voor hom die evangelie gepreek het nie.
Die dwaalleraars wat ná Paulus in Galasië aangekom het, het op hom neergesien. Wie is hy nogal? Wie het hom die volmag gegee om hier te kom werk? Watter kerk of organisasie het hom gestuur? Hulle het dus sy lering verwerp en ’n heel ander boodskap verkondig, soos ons nog sal sien.
Paulus begin deur te bevestig dat hy nie uit sy eie na Galasië gekom het nie. Hy is as apostel geroep, nie deur mense nie, maar deur God self. Jesus Christus het Hom aan Paulus geopenbaar en sy lewe totaal omgekeer terwyl hy op pad was om Christene te vervolg (vgl Hand 9:5). Hy kan dus met gesag praat, want dit is God wat hom gestuur het. Hy is nie soos die dwaalleraars wat hulleself aangestel het om hom te kritiseer nie.
GEBED: Here Jesus, dankie dat U ons roep om op die een of ander manier in u diens te staan.
Lees vanaand in Galasiërs 1:6-10 hoe moedeloos Paulus klink omdat die gemeente so vatbaar is vir ’n dwaalleer.
Saterdag 14 Februarie 2105 • Lees eers Galasiërs 1:11-24
Pasop vir dwaalleraars
… die evangelie wat ek verkondig, is nie deur ’n mens uitgedink nie (1:11).
GESELSVRAAG:
Wat moet ons doen om gered te word?
“Wat my pla, is hoe streng die Here gaan merk op die oordeelsdag,” merk ’n ouderling by ’n wyksbyeenkoms op. Dit is ’n vraag wat baie lidmate pla, veral omdat ’n mens bewus geword het van God se heiligheid tydens ons studie van Levitikus. Kan ’n mens ooit goed genoeg wees om die hemel te verdien?
Galasië het ’n groot deel van die hedendaagse Turkye uitgemaak. Paulus was die eerste sendeling wat die evangelie dáár gaan uitdra het. Nou moes hy hoor dat daar ander leraars ná hom gekom het wat ’n ander boodskap verkondig het. Hulle het die mense geleer dat ’n nie-Jood eers ’n Jood moes word deur hom te laat besny voordat hy gered kan word. Paulus stuur dus hierdie ernstige brief aan die gemeente om hulle te waarsku teen dié dwaling.
Dié kosbare brief is ook vir ons bewaar sodat ons die troos kan hê dat ons uit genade alleen gered word. Ons ontvang dit deur geloof, nie verdienste nie. Dit is op grond van wat Jesus gedoen het, nie wat ons gedoen het nie. Alle ander godsdienste is gegrond op verdienste. Jy moet goed genoeg wees. Daarom kan geen ander godsdiens vir jou sekerheid gee nie. Hulle hoop maar vir die beste. Maar die evangelie wat van God af kom, is heel anders. Ons kan God se genade sonder verdienste ontvang. Maak bloot jou lewe vir Hom oop. Wat ’n wonderlike boodskap.
GEBED: Dankie dat U vir ons die pad na redding berei het, Here.
Lees vanaand in Galasiërs 2:1-5 hoe Paulus die gesag van die kerk in Jerusalem ook agter hom gehad het.
Sondag 15 Februarie 2105 • Lees eers Psalm 29:1-5
Die stem van die Here
Die stem van die Here is magtig, die stem van die Here is vol majesteit (29:4).
GESELSVRAAG:
Waar kan ons vandag die stem van die Here hoor?
“Die honde se ore is baie gevoelig vir geluide,” vertel my dogter. “As daar donderweer is, is hulle totaal verskrik. Hulle storm in die huis in en sowel die Deense hond as die skaaphond probeer onder die koffietafeltjie wegkruip.” Mense se ore is minder gevoelig. Tog wil ’n mens soms uit die kerk vlug as die musiekgroep die klank so oorverdowend hard stel dat jy oorpyn daarvan kry.
Dawid beskryf die donderweer in hierdie psalm as God se stem. Ons almal wat ’n regte, egte elektriese storm beleef het, het groot respek vir die weerlig. Almal ruk van die skrik as die bliksem naby tref. Maar God praat nie altyd so hard nie. Soms praat Hy met ’n fluistering in die windstilte (vgl 1 Kon 19:12).
God praat ook op ander maniere met ons. Soms praat Hy deur ’n storm of ’n ander ramp. Maar dikwels praat Hy ook met ons deur mense. Vandag sal miljoene mense die Here met hulle hoor praat waar hulle in hul gemeentes vergader. Dit hoef nie noodwendig deur die preek te wees nie. Dit kan ook in die woorde van ’n lied wees, of in ’n gebed. Soms ervaar ons dat die Here in die stilte met ons praat deur sy Gees, as ons ingestem is om na Hom te luister. Wat het jy vandag by die Here gehoor? Of verlede week?
GEBED: Here, vandag is u dag. Help my om vandag u stem te hoor waar ek ook al gaan. Ek wil doen wat U my beveel.
Maandag 16 Februarie 2105 • Lees eers Galasiërs 2:6-10
Elkeen het ’n werk
Ons het ooreengekom dat hulle die evangelie aan die Jode sou verkondig, en ons aan die nie-Jode (2:9).
GESELSVRAAG:
Wat doen jy vir die Here?
“Net soos die liggaam ’n eenheid is en baie lede het, en soos al die lede saam, al is hulle baie, een liggaam vorm, so is dit ook met die liggaam van Christus,” skryf Paulus in 1 Korintiërs 12:12. Die kerk van die Here is ook nie net een denominasie nie. Alle ware gelowiges vorm saam die liggaam van Christus op aarde. Ons moet mekaar aanvul en mekaar ondersteun. As ons teen mekaar begin werk, is dit ’n teken van ’n kanker. Maar as ons mekaar aanvaar en elkeen doen die spesiale werk waarvoor die Here ons geroep het, versterk ons die hele liggaam.
Die apostels het gou besef dat die Here besondere gawes aan hulle elkeen gegee het met die oog op die werk wat hulle vir Hom moes doen. Hulle het besef dat Paulus geroep en toegerus was om oor kultuurgrense heen die evangelie aan nie-Jode te verkondig. Sommige van hulle was weer beter toegerus