solank jou lewe deur positiewe gevoelens en ’n mate van konsekwentheid gekenmerk word.
•Jy sal dalk nie altyd van al jou baba se eienskappe hou nie. Dit beteken nie noodwendig dat julle ’n ongelukkige gesin gaan wees nie en dit maak jou ook nie minder lief vir jou kind nie.
Onthou:
•Jy kan nie ’n baba bederf met te veel liefde nie.
•Daar is nie net een regte manier om kinders groot te maak nie.
•Jy bestuur ’n kind, nie ’n projek nie – doeltreffendheid is nie die belangrikste aspek nie.
•Bou jou roetine rondom jou baba se fisieke en emosionele patrone.
•Die vermoë om te ontspan oor die lewe is nou net so belangrik soos tydens jou swangerskap en die kraamproses.
•Daar gaan donker dae wees, maar die son sal altyd weer skyn.
•Bespaar jou energie as dinge woes gaan deur bloot van uur tot uur te leef.
•Aanvaar alle aanbiedinge van hulp.
•Babas is baie taaier as wat ’n mens dink.
FOPSPENE
Suig is ’n belangrike refleks en hoewel die behoefte gedeeltelik bevredig word wanneer Baba drink, moet ons onthou dat dit ook ’n emosionele faset het. Jy moet Baba genoeg in jou arms vashou en sus, maar party babas het eenvoudig ’n hoër behoeftevlak as ander, en ’n fopspeen kan help om onnodige of gereelde trane waarvoor daar oënskynlik geen ander rede is nie, te voorkom.
Borsbabas verkies dikwels Ma se bors bo die fopspeen, hoewel daar ’n goeie kans is dat Baba tevrede sal wees as jy die regte grootte gebruik (dit is ’n algemene fout om ’n fopspeen met ’n te groot tiet te gebruik), en verkieslik een van lateks, eerder as silikoon. Die vreemde gevoel en vorm van die “tiet” kan borsbabas verwar en veroorsaak dat hulle nie meer doeltreffend vassuig aan die bors nie. ’n Ortodontiese tiet sal sulke probleme tot die minimum beperk.
As jy graag wil borsvoed en tot elke prys wil voorkom dat Baba sproei kry, is dit beter om nie ’n fopspeen te gebruik nie.
Maak die fopspeen deeglik skoon en vermy liefs steriliseeroplossings aangesien die sproei-organisme in sommige soorte kan oorleef. Was dit deeglik met seepwater, plaas dit dan 10 minute lank in ’n houer vars gekookte water en bewaar in ’n lugdigte houer.
BOETIES EN SUSSIES
’n Nuwe baba behoort altyd ’n welkome geskenk te wees vir ’n ouer broer of suster! Betrek boeties en sussies deur hulle met take te laat help soos om ’n voetjie te was, die hare saggies te borsel of Baba se handjie vas te hou terwyl jy hom bad. Al is jy miskien haastig en wil jy Baba se badtyd so gou moontlik afhandel, sal dit jou peuter help om die baba te aanvaar as jy hom ook laat deelneem. As jou peuter ingesluit en geborge voel, sal hy gou weer met sy eie speletjies voortgaan. Sit ’n spesiale tydjie opsy vir jou ouer kind – lees byvoorbeeld vir hom terwyl jy Baba voed.
Probeer om nie te veel klem te lê op hoe “groot” die ouer kind is nie, en moenie van haar verwag om meer volwasse as haar ouderdom op te tree nie. Onthou dat die ouer kind eers onlangs sy posisie as middelpunt van sy ma se aandag moes prysgee en steeds behoefte het aan gerusstelling. Skakel probleme uit deur erkenning te gee aan hierdie behoefte. ’n Mate van regressie op terreine soos toiletonderrig, voeding en die behoefte aan soog is heeltemal normaal en sal gou weer oorwaai mits jy nie te veel van ’n ophef daaroor maak nie.
Drie
Koliek
Knieserigheid, krampe en koliek
Koliek is een van daardie moeilik omskryfbare toestande. Dit word onderskeidelik beskou as oormatige winderigheid, maagkrampe, voedingsprobleme, ’n honger baba en óf aanhoudende gehuil óf ’n gehuil wat met voedings verband hou. Dit is een van die belangrikste redes waarom nuwe ouers hul kind na die dokter, apteker of kliniek neem. Mediese personeel doen gewoonlik ’n standaard-diagnose of -behandeling aan die hand: hulle sal jou uitvra, na Baba se maaggeluide luister en soms ’n X-straalondersoek laat doen, veral as hy dikwels braak. Krampwerende middels word gewoonlik voorgeskryf en jy word huis toe gestuur met die versekering dat die toestand wel met verloop van tyd (binne drie tot vier maande) vanself sal opklaar as niks anders dan wil help nie.
In werklikheid is dit Baba se aanhoudende gehuil, oënskynlike pyn en Ma se uitgerafelde senuwees en onsekerheid wat ’n mens dwing om ’n oplossing te probeer vind – die presiese diagnose is nie so belangrik nie, behalwe dat dit help om die beproewing ’n naam te gee. Dit op sigself laat die hoop opvlam dat daar lig aan die einde van die tonnel is. In hierdie gids kyk ons na sewe verskillende soorte koliek. Jou baba se simptome mag moontlik in meer as een kategorie tuishoort, maar sy kan ook verskillende simptome op verskillende tye hê. Pas eenvoudig die verskillende wenke na behoefte toe.
Die ma-baba-spanningsiklus
Dit is ’n welbekende feit dat koliek meer dikwels by eerste babas voorkom, wat heel moontlik toegeskryf kan word aan die verstaanbare angstigheid wat menige ma ervaar oor die hantering van haar pasgebore baba en hoe om sy behoeftes te vertolk. Hoe meer gespanne Ma of Baba raak, hoe meer word dit deur die ander party weerspieël. Dit is sinneloos om te probeer vasstel wie eerste gespanne was: konsentreer eerder daarop om die afwaartse spiraal van dié bose spanningskringloop te verbreek. Baba en Ma vorm vir alle praktiese doeleindes ’n eenheid. As jy dit begryp, is die stryd halfpad gewonne om ’n oplossing vir die probleem te vind.
Beproef hierdie wenke:
•Speel voortdurend musiek, veral musiek wat jou gelukkig laat voel, jou laat saamsing of jou help kalmeer.
•Gaan stap twee keer per dag met Baba: dit is uitstekende oefening vir jou en die beweging sal Baba kalmeer.
•Onderhandel met jou lewensmaat, ’n familievriend of vertroude versorger om jou elke tweede dag ’n uur lank af te los. Gaan bad, drink ’n koppie tee, slaap, lees, werk ’n bietjie in die tuin of doen enigiets wat jou opbeur.
•Gaan weekliks vir ’n refleksologie- of aromaterapiemassering.
•Steek ’n laventelkers aan wanneer jy besonder gespanne voel.
•Kikker jou huis op met vars blomme met ’n paar takkies laventel tussenin.
•Neem 3–4 maal per dag Rescue Emotion-tablette om angstigheid te verlig en jou te help om dinge te hanteer. Jy kan ook met veiligheid 2 maal per dag vir Baba 1 fyngemaakte tablet, opgelos in 5 ml afgekoelde kookwater, gee.
Soorte koliek
BABA MET ’N SENSITIEWE SPYSVERTERINGSTELSEL
As ’n baba vroeggebore is (of selfs ’n week of twee voordat jy spontaan in kraam sou gegaan het, geïnduseer of met behulp van ’n keisersnee gebore is), is daar blykbaar ’n verhoogde moontlikheid van maagprobleme soos oormatige winderigheid, krampe en koliek. Die spysverteringstelsel is dalk bloot nog nie volledig ontwikkel nie.
As een of meer familielede van nature spysverteringsprobleme ervaar (soos spastiese kolon, prikkelbaredermsindroom, hardlywigheid, ’n geneigdheid tot diarree of slegte spysvertering), het jou baba dit miskien ongelukkig getref en die toestand oorgeërf, en is die koliek die voorloper daarvan. As dit lyk of dit die geval is, beproef gerus die wenke wat vir daardie persoon help vir Baba.
Beproef hierdie wenke:
•Borsvoed verkieslik uitsluitlik, aangesien moedersmelk die maklikste verteer word.
•Brou