“Stunning.”
“Ek is bly.”
“Sien jy die dude by daardie tafel?” Terwyl hy sy mond met die servet afvee, wys hy met sy oë na ’n man met woeste hare, ’n baard en donker borskrulle wat by sy oopgeknoopte swart hemp uitrank. “Hy is my sielkundeprofessor. Hy doen research oor male prostitutes by ’n boy brothel in Camps Bay. Tagtig persent van die laaities se clients is getroude mans. Makes you think, hey.”
Ek verstik aan ’n druppel coulis.
“Try ’n bietjie wyn.” Boerseun stoot die glas nader.
Die vrug van die wingerdstok laat my hoes bedaar. “Wat is SL?” vra ek vir hom.
“SL wat?”
“Jy het gesê jy is SL.”
“SL?”
“In Desember verlede jaar, man.”
“You got me, dude. Waar het jy dit gehoor?”
“Nie gehoor nie, gelees. In die Landbouweekblad.”
Hy knip sy oë ’n paar keer en trek die donkerbril af op sy neus.
Ek sit my mes en vurk netjies langs mekaar op die bord neer. “In jou advertensie in die Landbouweekblad het jy gesê, jy is SA, SL.”
Hy stoot sy bril terug op sy kop.
“’n Suid-Afrikaanse SL,” verduidelik ek.
“O, my profile. Hoekom sê jy nie so nie? SA, SL, GSOH, LTR.”
“LTR? Wat’s dit?”
“Long-term relationship. Gewoonlik sit ek dit nie in nie. LTR is nie vir my nie.”
“Wat beteken SL?
“Wil jy vir my sê jy weet nie waarvoor dié letters in ’n gay profile staan nie?”
“Nee,” sê ek.
“Fuck me dead.”
My vingers verstyf om die wynglas se steel.
“O, my hel,” sug hy. “SA, SL en GSOH staan vir straight acting, straight looking en good sense of humour.”
“Gesondheid,” sê ek en neem ’n sluk.
“Cheers. En nou vir dessert?”
Ek het klaar geëet, maar Boerseun het nog plek vir sjokolademousse. Twee bakkies, as ek nie omgee nie, “combined met ice cream.”
Hy het op ’n plaas in die Vrystaat grootgeword, vertel hy terwyl ons wag vir sy nagereg, en is besig met ’n graad in die sielkunde aan die Universiteit van Kaapstad. “Nee,” sê hy, “ek verlang nie terug plaas toe nie. Ek dig die stad.”
Hy wil weet hoeveel plase ek het.
Sy hande is sag en wit, mooi hande met lang vingers, al is hulle nie sterk genoeg om Blommetjie se taai spene te trek nie. Maar ons kuier lekker, sê ek vir myself. Hy het ’n goeie sin vir humor. Hy is nie vet nie. Nie materiaal vir ’n eerste rugbyspan nie, maar durf ek kieskeurig wees op my ouderdom?
“Ek het een plaas. ’n Groot plaas. Vyfduisend hektaar.”
“Wow! Jy’s ryk.” Hy lek sy poedinglepel vir oulaas af, sit dit terug in die bakkie en vryf oor sy bedelaarsmaag. “Koffie by jou hotel?”
Toe ek niks sê nie, sê hy: “Dan wys ek jou wat w/e beteken.”
“Alea iacta est,” sê ek. Die lot is gewerp. In die Skrif staan daar geskrywe: Ragab was ’n hoer en haar lewe is gespaar. Sal ek op my ouderdom met die Heilige Skrif stry? Voor die mure van Jérigo kan intuimel, roep ’n stem my op die naam.
“Daan! Daantjie! Wat maak jý hier?”
Ek vou my servet stadig op, sien die kers op ons tafel flikker en hoor my stoel kraak toe ek versigtig omdraai in die rigting van waar die stem tot my roep.
Getooi in ’n asblou aandrok, blou soos haar gekrulde hare, staan Sannie Coetsee en ’n man in ’n aandpak breed agter my en Boerseun. Haar tong lek oor haar rooi lippe en haar oë verorber die jong man langs my wat stadig opstaan en hulle beleefd groet.
Die Tempel van Ewige Vrede,
Longshan,
China.
4 Maart
Liewe Magrieta,
My geskiedenis word by die dag ’n groter verleentheid vir my.
Ek het vandag geskryf hoe ek Sannie Coetsee en haar nuwe kêrel een aand in ’n restaurant in Kaapstad raakgeloop het. Ek en ’n vriend was besig om te eet toe sy daar aangesit kom.
Vroeër die aand in dieselfde restaurant het ’n vrou se parfuum my laat dink aan die keer toe ek ’n meisie langs die Mooirivier agter in haar kar gevry het; ek kon weer sien hoe sy hoendervleis kry, hoor hoe sy na haar asem hyg en voel hoe die fyn haartjies regop staan toe my vingers oor haar maag streel.
Nou wip jy jou weer. Dit het in my jeug gebeur, op universiteit, Magrieta, jare voor ek jou ontmoet het.
Dan skryf ek liewer nie vanaand verder nie.
Jou langslewende eggenoot,
Daan van der Walt
Конец ознакомительного фрагмента.
Текст предоставлен ООО «ЛитРес».
Прочитайте эту книгу целиком, купив полную легальную версию на ЛитРес.
Безопасно оплатить книгу можно банковской картой Visa, MasterCard, Maestro, со счета мобильного телефона, с платежного терминала, в салоне МТС или Связной, через PayPal, WebMoney, Яндекс.Деньги, QIWI Кошелек, бонусными картами или другим удобным Вам способом.